Palemia ma le Fanafana au

0
57

(OFISA SOOUPU) Na fa’aalia e le Palemia Afioga Tuilaepa Dr. Sailele Malielegaoi i le faatalatalanoaga ma tusitala i lenei vaiaso le toe tago ai lea i lana fana aū e fa’ai’ila ma tapena e toe tauva i taaloga a le Pasefika i le tausaga fou.

I le tausaga 2007 na talimalo ai Samoa i nei taaloga, sa avea ai Tuilaepa ma sui o Samoa i le taaloga o le fanafana aū lea na ia manumalo ai i le pine siliva.

Na saunoa Tuilaepa e faapea; “Oi o le a ou tago foi i a’u meafaigaluega; e le taofia, ia faapea se mea faigata lena mea o le meme’i o le fana aū, na’o na meme’i mai ã ‘aua le keke le isi lima lea, a ia sa’o le lima lea”

“O lena la o le a ou latu nei faatonu loa ia la’u fanua; õ e toe aumai mea a le toeaina e toe fa’ai’ila, o le a ou toe tago i ai; ou te le kea a la pe maua se pine pe leai.”

“O e manatua foi le tausaga na fai ai taaloga ia i inei?

Tusitala; O le tausaga 2007.

Tuilaepa; O lona uiga e atoa i le tausaga fou le 12 tausaga, a’o lea toeitiiti atoa le 80 o o’u tausaga. Ua e vaai la i ai i le manaia; O le a se tou vaai mai, o o’u foliga 80?

Tusitala; Leai o lena ã e te talavou toe malosi lou tino.

Tuilaepa; O lea a ou te talavou;  Toeitiiti a tã le afa o le 7 ae lua toe fa’ase’ea a a’u, na ou faapea o le a sao lenei aso, e te lua le fa’ase’ea ai a’u. Matuã lua le alolofa tele i le Palemia o le Malo Tutoatasi o Samoa. E i ai se isi lua mea pila o totoe?

Tusitala Leai lau Afioga, o le measili lea ua e tali mai i le fesili na ou mana’o a ou te fia iloa.

Tuilaepa; O le a?

Tusitala; O lou toe alu ã e toe fa’ai’ila uma au mea faigaluega e faaoga i taaloga o le tausaga fou.

Tuilaepa; Ioe, ou te alu a e fa’ai’ila a’u mea faigaluega, atonu ã e o’o atu i se aso sếsế atu se mea tū i vae o le to’atolu lea e agaia le Malo, matuã manaia tele.

Ae u i lea, o se itu tãua ma se lu’i lelei tele lea mo ‘au taaalo a Samoa a’o tapena mo taaloga o le tausaga fou, auã o lea ua amata mea ta’ita’i o le Malo, e tapena lelei ina ia tele ni pine a Samoa e maua, auã o se luma tele lea ia Samoa le o mai o moa folau vivini i o tatou laufanua.