Faa-Samoa

Falepuipui mo le 6 Tausaga ma le 6 Masina i le Faiaiga Faamalosi

October 3, 2026

158

Ua fa‘asalaina se alii e 22 tausaga le matua, i le ono tausaga ma le ono masina i le falepuipui mo le fa‘amalosi o se tama‘ita‘i a o moe i lona fale.

Na fa‘amaonia moliaga a Fetuao Koneferenisi – o le fa‘amalosi, feso‘ota‘iga tau feusua‘iga, ma le ulufale fa‘asolitulafono i se fale i le pō.

Na tula‘i mai le solitulafono i le vaveao o le aso 5 Oketopa 2025.

Na saunoa le afioga i le Fa‘amasino ia Fepuleai Ameperosa Roma, na ulufale Koneferenisi i le fale e ala i se faamalama uaea valavala, sa lata i le faitoto‘a pito i luma, ma aga‘i atu ai loa i le potu sa moe ai le tama‘ita‘i.

I lipoti a leoleo sa faamauina e le Fa‘amasinoga, sa moe le tama‘ita‘i ma sa matuā a‘afia i le ‘ava malosi. O lona tulaga sa iai, na lē mafai ai ona ia tuuina atu sana maliega sa‘oloto i se gaioiga tau feusua‘iga.

Na saunoa le afioga i le Faamasino, sa lagolagoina le molimau a le tama‘ita‘i sa aafia, i le fa‘amatalaga a Koneferenisi i lana fa‘atalanoaga ma leoleo, lea na ia ioeina ai lona ulufale i le fale ma lona faia o gaioiga tau feusua‘iga i le tama‘ita‘i a o moe.

I le iloiloina o le fa‘asalaga, na fa‘amamafa e le Fa‘amasino le tulaga sa lē mafai ai e le tama‘ita‘i ona puipuia o ia lava, fa‘apea le faia o le solitulafono i totonu o lona lava fale.

Na saunoa Fepuleai o le fale o se nofoaga sa tatau ona malu ma saogalemu ai le tamaitai sa aafia.

Sa finau le itu a leoleo e tatau ona fa‘atulaga le solitulafono i le vaega lona lua, po o le Band 2, o ta‘iala mo fa‘asalaga o le faiaiga fa‘amalosi.

Sa latou talosagaina se amataga o le fa‘asalaga i le va o le 12 ma le 15 tausaga.

Peita‘i, sa finau le itu a lē ua molia e talafeagai le vaega muamua, po o le Band 1, lea e 8-10 tausaga le faasalaga.

Sa fa‘atulaga e le Faamasino le solitulafono i le pito maualuga o le Band 1. Na ia fa‘atulaga ai le iva tausaga i le falepuipui e amata ai le fuafuaina o le fa‘asalaga.

Na toesea le lua tausaga ma le ono masina ona o nisi o tulaga (mitigating factors). O le talavou o lē o loo molia, e leai ni ona moliaga muamua, o fa‘amatalaga lelei mai nisi o molimau e uiga ia te ia, o lona salamō ma lana fa‘atoesega.

Na fofogaina i luma o le Fa‘amasinoga, na gata le soifua tau a’oga o lea alii i le a‘oga tulagalua. Sa faigaluega muamua i le vaega o faletalimalo, ae o le tolu tausaga talu ai sa galue ai i le fa‘amamāina o ta‘avale mo se kamupani taavale rental.

Samoa’s leading provider of ICT Solutions.

Sa tuuina atu e lana faife‘au ma lana pule i le galuega ni fa‘amatalaga lelei e uiga ia te ia.

Na talia e Fepuleai, ua ia salamō, ae sa fa‘amamafa e tatau i fa‘asalaga mo sauāga tau feusua‘iga ona atagia ai le matuiā o le solitulafono, ae maise le puipuiga o tagata ma le a‘afiaga o ē ua afaina.

Ina ua toesea nisi o masina e pei ona masani ai, na tula’i mai ai le fa‘asalaga e 6 tausaga ma le 6 masina i Tanumalala.

Na fa‘asalaina fo‘i Koneferenisi i le fa tausaga mo feso‘ota‘iga tau feusua‘iga e lē tusa ai ma le tulafono, ma le lua tausaga mo le ulufale fa‘asolitulafono i se fale i le pō.

Public Notices