Ua amata le galuega o le fausia o le maota o le Faamasinoga i Salelologa Savaii.
I le asiasiga a le taitai o le atunuu Laaulialemalietoa Leuatea Polataivao Fosi Schmidt ma le kapeneta I le vaiaso lenei na molimauina ai ua amata fausia le faavae o lea atinae.
Saunoa le Ofisasili o le Matagaluega o Faamasinoga ma mataupu tau I le faamasinoga o Papalii John Taimalemalelagi e 3 vaega tetele ua vaevaeina ai le galuega.
“O le vaega muamua o le fausia o fale faamasino mo le Faamasinoga Maualuga, Faamasinoga Faaitumalo ma le Faamasinoga o Fanua ma Suafa faapea ai ma le auaunaga a le faamasinoga I ona vaega eseese.
“O le fausia o lea vaega o loo nafa ma le Kamupani a le Ah Liki Construction ma e $12miliona tala lona faatupega atoa.
“O le vaega lona lua o le fausia lea o le apitaga e faamautu iai afioga I Faamasino pe a malaga i Salafai e faatinoa mataupu, ma o le fausia o lea apitaga o le a nafa ma le kamupani a le New Era Construction Ltd lea e $2miliona tala lona faatupega.
“Ma le vaega mulimuli o le faalaugatasia atoa o le fanua ma le fausia o le pa e si’o atoa ai le lotoa e aofia ai ma togalaau e faamatagofie ai lea nofoaga, lea o le a nafa ma le kamupani a le Apia Lua Ltd ma e $3miliona lona faatupega.”
O le tauaofai o lea galuega e $17miliona tala ma o loo faatupe lava e le malo o Samoa.
Saunoa le taitai o le malo Laaulialemalietoa Leuatea Polataivao Fosi Schmidt ua o gatasi le fuafuaga a le malo ma le finagalo o le afioga I le Faamasino Sili,
“O a uma mataupu tau I le faamasinoga e fitoitonu I Savaii, o le a faatino uma I Savaii e aunoa ma le toe tau malaga o le mamalu o le atuuu o loo aumau I Savaii I Mulinuu.”
Faaalia e le afioga I le palemia o le a faatotoga lelei lea galuega pe a mae’a I lona tulaga maualuga ina ia lelei atoatoa maota ma meafaigaluega e faatino ai auaunaga uma.”
O lea galuega ua fuafua e mae’a uma vaega tetele e tolu I le masina o Ianuari I le tausaga e 2028.
- NZ Immigration Urge People Planning to Spend Christmas with Family in NZ to Apply Early for Visas - October 4, 2026
- Toa Samoa and Fetu Samoa to Return Home for World Cup Prayer Service - October 4, 2026
- Asia Games Opens Door for Oceania Weightlifting Teams - October 3, 2026
