O le tele o osofaiga a le Matagaluega o Leoleo o lo’o faatino, e le misi ai lava seleni e maua mai ai, ma ua tele finagalo ua lagalagã mai i le mamalu o le atunuu ma fesiligia ai poo fea tonu e ave iai seleni o loo maua mai i osofaiga.
Ua saunoa le afioga i le Palemia, le Susuga i le Laaulialemalietoa Leuatea Polataivao Fosi Schmidt, o loo ua amata ona faataatia tulaga o faiga faavae fou a le Malo mo le malu puipuia o seleni e maua mai i nei osofaiga.
“O se tasi foi ia o tulaga sa tele ai foi le fesiligia ma le tuuaia o le Matagaluega o Leoleo, e uma ane lava ua leiloloa uma evidence nei..”
“Ma o loo taumafai nei e fa’ata’atia faiga fa’avae fou ma tulaga ina ia manino lelei poo fea e fa’ataatia ai mea totino uma e maua mai i osofaiga.”
O le isi tulaga o loo silasila iai le Malo o le tamaoaiga o i latou e maua mai i le faatauina o fualaau ma laau faasaina ma o le talitonuga o le Taitai o le atunuu ua tatau ona toe faatulaga lelei faiga faavae ma le tulafono ina taatia i lona tulaga lelei.
“E iai le malosiaga o le tulafono e fao ai soo se mea, aua o loo maua mai i tupe sa maua mai fefaatauaiga o fualaau faasaina, peitai, o loo iai le tulafono e tatau ai ona toe teuteu le malosiaga o le Ofisa o le Matagaluega o Leoleo ina ia pulea e le Malo mea uma nei..
“Pulea e le Malo aupuega, aseta, tupe, ina ia mafai on faatulaga i totonu e faaaoga e le Matagaluega ma le ofisa ma le Malo, mo tulaga talafeagai e fesoasoani ai i le finauina o mataupu uma nei..
“A alu alu taualumaga o le faamasinoga ae matua manino lelei o le tamaoaiga o tagata nei na maua mai: o fanua, fale, taavale ma mea uma – afai o mea uma na e tatau ona repossess uma, ma e tatau ona aveese mai i tagata nei ona e le’o ni mea na maua mai ini auala lelei.”
Faamautu mai e Laaulialemalietoa o ia vaega uma o le a faaleleia pe a mae’a ona fa’ataatia faiga faavae fou a le Matagaluega o Leoleo, ina ia malu uma vaega uma o loo fesiligia e le toatele o le mamalu o le atunuu.
O se mataupu sa fesiligia ai foi e le Samoa Global News le Sui Komesina o le Matagaluega o leoleo o Leiataua Samuelu Afamasaga i lana feiloaiga ma ofisa faasalalau i le Aso Toanai na sei mavae atu nei.
Peita’i na saunoa le Sui Komesina Lagolago ia Norman Tuafale Meni, o seleni o loo maua mai i osofaiga e taofia uma e leoleo ae faagasolo suesuega, peitai a mae’a suesuega..
“O seleni o loo maua o loo forfeit i le taimi nei i le faagasologa o suesuega.
“A mae’a la suesuega e iai le mea e ta’u o le “proceeds of crimes” e fai le application a leoleo e cease ai i lalo o meatotino a le Malo.
“Ae a faapea e le faamaoniaga moliaga ia e toe fo’i lava i le tagata e ana le seleni.”
“Mo laau malosi e le faatagaina i totonu o le atunuu e maua mai i osofaiga, e faatino e le Matagaluega le sauniga aloaia e faaleagaina ai..
“Ae mo laau faasaina o le mariuana e susunu i Tafaigata..
“Ae mo fualaau faasaina o le aisa, e faaaaoga e le matagaluega le masini faapitoa a le Matagaluega o le Soifua Maloloina o loo susunu ai otaota a le maota gasegase i Motootua (incinerator), e faaleaogaina ai fualaau faasaina pe a mae’a taualumaga a le faamasinoga.
- Poumau Tiufea Vaa, Miss Sili Ecofarm is your Miss Samoa 2026 - September 6, 2026
- Little Rina Wins Inaugural Measina Festival Fautasi Race - September 3, 2026
- Miss Taumeasina Island Resort Inspired by Her Grandparents - September 2, 2026
