Tusia: Pesetā Tusiga Taofiga, Ofisa o le Sooupu a le Malo. Ua silasila mamao le Palemia o Samoa, Susuga i le Laaulialemalietoa Leuatea Polāta’ivao Fosi Schmidt, e faatu se Ofisa mo se Amapasa o Samoa i totonu o Isaraelu. O le tele o itu tāua e faamanuiaina ai Samoa i se faigapaaga ma Isaraelu – o le agaga moni lena ua finagalo ai le Palemia ina ia fa’amautū ma fa’avaeina so tatou Ofisa Autū i totonu o Isaraelu.
E tele itu tāua mo le atiinaeina o Samoa pe afai e taunu’u lenei moemitiga a le Susuga i le Laaulialemalietoa.
O le gata o itu e fesoasoani malosi ai i le atina’eina o le tamāo’āiga o Samoa, ae silisili ai le fa’amausalīina o le so’otaga vāvālalata o Samoa ma Isaraelu i talitonuga fa’akerisiano moni.
O Isaraelu o le nu’u o le Atua Soifua, o lo’o fai ma fa’avae papa o le Mālō Tuto’atasi o Samoa.
E lē nātia le loloto o le fa’atuatuaga moni o Ta’ita’i o Samoa, i le alagātatau ma le tāua o le iai o so tatou Sui i totonu o Isaraelu, e fai ma suli va’aia o Samoa i le so’otaga ma le nu’u o le Atua.
I le ma lea, o Isaraelu o se tasi o atunu’u o lo’o taulāmua ma tumati’e i le saoasaoa o atina’e i so’o se auaunaga e aofia ai ma feso’otā’iga tekonolosi fa’aneionapo, o se ata va’aia o le matuā mo’omia e Samoa o le lagolagosua mai o Isaraelu, auā taumafaiga mo le atina’eina o lo tatou tamāo’āiga i lona tulaga aoao tetele.
O itu tāua nei, o lo’o fa’avae ai le finagalo maumaua’i o le Palemia, ina ia fa’avaeina ma fa’atūina so tatou Ofisa mo le Amapasa o Samoa i totonu o Isaraelu.
1: Suiga Fou ma Metotia Fou mo Auaunaga Tau Feso’otā’iga Fa’aneionapo
O Isaraelu, o se tasi o atunu’u iloga i le lalolagi atoa, e maoa’e ma tu mauāluga ana feso’otā’iga tekonolosi fa’aneionapo, ma e matuā mana’omia lava e Samoa le la’asia o le isi la’asaga sili atu i ana auaunaga tau tekonolosi fa’aneionapo, e aofia ai telefoni, uaealesi, televise, leitiō, upega tafa’ilagi ma isi.
2: Fa’amapu’e atina’e tau Fa’ato’aga ma le Puipuiga o le saogālēmū o taumafa mai fa’ama’i
E tele atina’e tau fa’ato’aga a Isaraelu o lo’o galueā’ina i luga o le toafa ma e fa’aāoga ai metotia fa’aneionapo mo le suāvai fa’asoasoa auā le fa’asūsūina o le lau’ele’ele mātūtū o lo’o fa’atino ai fa’ato’aga.
O le tāua o lenei Ofisa Fou pe ā mautū, e unā’ia ai avanoa mo le au fai fa’ato’aga a Isaraelu e malaga mai ai mo a’oa’oga fa’apitoa mo le au fai fa’ato’aga i Samoa, ia maua tomai fa’apitoa mo le galueā’ina o metotia fou auā atina’e tau fa’ato’aga, lafumanu ma faigāfaiva.
3: Suāvai Mamā | Tali atu i Suiga o le Tau
O le taunu’uga o lenei fuafuaga mamao, o le ā i ai se faigāpa’aga tu’usa’o aga’i i le Pulega o Suāvai a Isaraelu, ma ia mafai ai ona tatou galulue fa’atasi mo auala e fo’ia ai le fa’ateteleina o suiga ogaoga o le tau, aemaise o ni vaegātupe ma auaunaga fou tau feso’otā’iga televavave fa’aneionapo e fa’amatu’u mai e fesoasoani ai i le puipuia o Samoa mai suiga ma’ale’ale o le tau ua i ai nei.
4: Soifua Mālōlōina | Auaunaga Fa’afoma’i
O Isaraelu o se tasi o atunu’u numera tasi i le auaunaga tau soifua mālōlōina, o le itu lelei lea mo le fa’avaeina o so tatou Ofisa Mautū i Isaraelu, ina ia unā’ia ai so’otaga vāvālalata o Mālō e lua, e ala i avanoa sikolasipi ma a’oa’oga fa’apitoa mo foma’i ma tausi soifua, fa’atulagaina o galuega tupito mo le soifua mālōlōina, o le tali atu i fa’alavelave tutupu fa’afuase’i, ma le fa’aāogaina o tekonolosi fa’aneionapo auā galuega tau le soifua mālōlōina.
5: Puipuiga o le saogālēmū mai feso’otā’iga tau tekonolosi ma le malu puipuia o tuāoi fa’avāomālō
O le va’ai mamao a le Mālō, ia telē se fesoasoani mai o Isaraelu, i auala e tineia, taofia ma puipuia ai o tatou lotoifale i so’o se itu, i le ono ofi mai ai o ni faiga fa’asolitulafono e pei ona va’aia i le tele o atunu’u o le lalolagi.
O le naunauta’iga ia malu puipuia teugātupe i Faletupe a le atunu’u lautele fa’apea le Mālō ina ia ‘aua ne’i sātia i ni faiga fa’asolitulafono.
O le fa’amalosia o fesoasoani mo le puipuiga o Samoa mai fuālā’au fa’asāina ma ‘aupega mālolosi lē fa’atagaina, fagota fa’asolitulafono o ogāsami o Samoa, gaioiga taufa’avalea e fa’aāoga ai ‘upega tafa’ilagi ma le puipuia malu o tatou uafu ma malae va’alele fa’avāomālō.
6: So’otaga fa’apa’aga fa’avāomālō i le va o le Mālō i le Mālō.
O Isaraelu e maua’a ma mafanafana lo latou so’otaga ma Amerika, o atunu’u o le Atu Europa, o Fa’alapotopotoga Tau Tupe i le Lalolagi aemaise o Fa’alapotopotoga Tau le Puipuiga ma Feso’otā’iga Tekonolosi Fa’aneionapo i le Lalolagi.
O le fa’anaunauta’iga iā Samoa, afai ae tino lenei fa’amoemoe tele, o le ā si’itia mauāluga ma faigofie ona latalata le galulue fa’atasi o Samoa ma Isaraelu i tulaga tau fefa’atauā’iga fa’avāomālō, aemaise o le talia gofie o sa tatou augani atu i isi atunu’u tetele o le lalolagi o lo’o faipa’aga ma Isaraelu, mo ni fesoasoani tatou te mo’omia ai lo latou tau’au.
Pe ā tu’u i le tulaga aoao tetele, e fitoitonu i auaunaga e manuia ai Samoa e ala i feso’otā’iga tekonolosi fa’aneionapo, o le puipuia malu o tatou taumafa mai fa’ama’i, o le maua pea o le suāvai mamā, o le soifua mālōlōina lelei, o le puipuia o Samoa ma o latou tamāli’iaga mai sauaga ma faiga fa’alēalofa a le au taufa’atavalea e fa’aāoga ai ‘upega tafa’ilagi ae silisili ai le silasila mamao a le Ta’ita’i o le Mālō ina ia tumati’e le atina’eina o le tamāo’āiga o Samoa mo lona lumana’i manuia.
O le atoaga lenā o le silasila mamao, ma le va’ai loloto a le Ta’ita’i o le Mālō.
- 194,267 Tagatanuu o Samoa sa maua le ta’i $150 tala - June 28, 2026
- A Fealofani tatou o Ta’ita’i – e Toafilemu foi le Atunu’u - June 27, 2026
- Pāsia Aloaia le Tala Faatatau Autu o le Tupe 2026/2027 - June 27, 2026
