O se alii e 50 tausaga le matua mai Fagali’i-Uta ma Asau i Savai’i, o John Kueva Mcfall, sa tulai i luma o le Faamasinoga ona o moliaga e faatatau i le uumia o fualaau faasāina, o le aisa ma le mariuana.
O ia o se tasi sa molia mai osofaiga e tele a leoleo, lea sa faagasolo ao lei faia le Kerisimasi e oo mai lava i le taimi nei, o loo nofo taofia pea o ia.
Na faailoa i taualumaga o le Faamasinoga, o le taeao o le Aso 20 Tesema 2025, pe tusa o le 5:00 i le vaveao, na agai atu ai leoleo e faia se suesuega i le nofoaga o loo nofo ai Kueva i Fagali’i.
I le taimi o le suesuega, na maua ai e leoleo se pepa sikareti lanu meamata i totonu o le potu moe o le ua molia. I totonu o lea pepa sa iai se tamai ato sipi na maua ai le 0.12 kalama o le fualaau faasāina o le aisa.
Na faaauau suesuega a leoleo. Pe tusa o le 6:00 i le vaveao na latou maua ai se tamai ato faafafa lanu uliuli. I totonu o lea ato sa iai se pepa sikareti lanu mumu, na maua atu ai mariuana e tusa ma le 0.36 kalama o loo taai i se pepa paepae.
Sa tulai John Kueva Mcfall i luma o le Faamasinoga ma ioeina moliaga e faasaga ia te ia, ma o loo faatali nei mo le Faamasinoga, i se faasalaga e tuuina mai.
Moliaga
O moliaga o loo feagai ma le ua molia e aofia ai,
• Umiaina o le fualaau faasāina o le aisa e tusa ma le 0.12 kalama, i lalo o Fuaiupu 17(1)(a) ma le 18(a) o le Tulafono o Fualaau Faasāina 1967
• Umiaina o le fualaau faasāina o le maruana e tusa ma le 0.36 kalama, i lalo o Fuaiupu 17(1)(a) ma le 18(b) o le Tulafono lava lea.
Na faailoa i le faamasinoga o le maualuga o le faasalaga mo nei solitulafono e mafai ona oo atu i le 14 tausaga i le falepuipui
Na taua foi i le faamasinoga o loo iai faamaumauga o se isi solitulafono sa faamaonia muamua mo lē ua molia, lea na faamaonia i le 26 Aperila 2024.
Na tulai i luma o le faamasinoga le tinā o Valasi Aiolupotea Tauilili Ele Aiolupotea, o le aunty o le ua molia. Sa ia talosaga i le Faamasinoga mo se fesoasoani e faaitiitia ai le faasalaga mo John.
Na ia faailoa i le Faamasinoga e leai ni matua o John, ma e talosaga atu ma le loto maualalo i le Faamasinoga ina ia silasila alofa i lona tulaga.
Na saunoa le Faamasino, le afioga ia Fepuleai Ameperosa Roma, ua uma ona ioe le ua molia i moliaga o loo faasaga ia te ia. Peitai, o le a iloilo e le Faamasinoga le talosaga a le aiga pe mafai ona maua ai se faamama avega i le faasalaga.
I le taimi nei, e lei faatagaina e le Faamasinoga le tatalaina o John, ma o loo taofia pea o ia a o faatali le faaiuga o lona faasalaga.
- Little Rina Wins Inaugural Measina Festival Fautasi Race - September 3, 2026
- Miss Taumeasina Island Resort Inspired by Her Grandparents - September 2, 2026
- Lise Marie Schmidt Pleads Guilty to Misleading Police with Damaging Lies about Samoa’s then Prime Minister Hon Fiame Naomi Mata’afa - September 2, 2026
