Tusia: Pesetā Tusiga Taofiga
E tusa ai ma le Matā’upu 97 [1][2] o le Fa’avae o le Mālō Tuto’atasi o Samoa 1960 na fautuaina ai e le afioga i le Palemia, Susuga i le La’aulialemalietoa Leuatea Polāta’ivao Fosi Schmidt ia Lana Afioga i le Ao Mamalu o le Mālō Tuto’atasi o Samoa iā Tuimaleali’ifano Va’aletoa Suālauvī II, ina ia fa’amaonia le tofia aloā’ia o le afioga iā Fa’amoetauloa Fa’asavalu Ah Siu Lin e avea ma Pule ma Su’etusi Sili a le Mālō.
O lenei tofiga fa’ale-Fa’avae, na fa’atautōina i totonu o le Palemene, ma o le afioga iā Fa’amoetauloa ua sui tulaga i le afioga iā Fuimaono Papāli’i Camillo Afelē ua fa’amavae i le mae’a ai o tausaga e tele sa tautua ai i le Mālō e tauala atu i lenei tofiga tāua.
Na malele fa’amanuia Lana Afioga i le Ao Mamalu o le Mālō i le filifilia ai o lenei tamāli’i i lea tofiga mauāluga a le Mālō.
E fa’apea fo’i i le saunoaga fa’amanuia mai le Afioga i le Ta’ita’i o le Mālō;
“O le filifilia fo’i o lau afioga i le Su’etusi Sili a lo tatou Mālō, lau tōfā Fa’amoetauloa, saga’i ane ‘ai o le tai, ia o tatou talitonu fa’atasi i lo tatou valā’auina, ina ia o tatou faia le measili ma le fa’amaoni mo Samoa.
“Tapua’i mai fo’i le Itumālō i le pa’ia i le ‘āiga Sā Pesetā, le mamalu i le Faleiva, tainane Matāutu ma le Muā’autasi, auā Salāfai, o la matou tatalo ia utupūpūina pea fulu o le Sega’ula ma saga’i mai tatou te tutūfa’atasi”, auā le tau’aveina o la tatou valā’auina, auā le atunu’u.”
Ata Pu’eina: Leaosā Fa’aifo Fa’aifo.
- Justice Alalatoa Rosella Papalii Receives Distinguished Alumni Award - October 11, 2026
- Samoa Wins Best Host Country Recognition at Miss Global - October 9, 2026
- ‘Ia Manumalo’: Signature Choir Releases New Anthem - October 9, 2026
