Toe Tolopo le Lauina o le Faaiuga a le Faamasinoga i le Aso 27 Mati 2026

Ua toe tolopoina foʻi e le Fa’amasinoga Fa’aitumalo le tu’uina mai o lana fa’ai’uga i le mataupu o lo’o aofia ai le Palemia, le afioga La’aulialemalietoa Leuatea Polataivao Fosi Schmidt, Fepuleai Faimata Sua, Li’o Faataumalama Auava, Lise Marie Schmidt, Samuelu Leau Su’a ma Sivai Kepi.

O le tolopoina lona fā lea o le lauina o le faaiuga. Na fa’ato’ese le Fa’amasino Sinia o le Fa’amasinoga Fa’aitumalo, Talasa Atoa-Saaga i ē ua molia, ma fa’ailoa mai o le tolopoina mulimuli lua – ua fa’atulaga mo le Aso Faraile a sau, 27 Mati 2026.

“Ua oo mai i lenei aoauli e talosagaina se avanoa mulimuli e faamae’a ai la’u fa’aiuga. Talu ai e iai isi vaega e mana’omia ai se isi taimi faaopoopo.”

“E lē māmā le mamafa o le avega o lo’o tauave e i latou o lo’o a’afia, ae e le mafai ona avatu se fa’aiuga ae e le’o atoatoa. Ou te asu atu ai vai mālū i lea tulaga.”

“Ae o le tolopooga mulimuli lea, o le Aso Faraile o le vaiaso fou i le itula e 1 o le a avatu ai la’u faaiuga atoatoa i lenei mataupu.”

Na fa’ailoa e le Fa’amasino o le lavelave o finauga fa’aletulafono ma le tele o pepa o faamatalaga fa’ai’u (closing submissions) sa tu’uina atu, o mafua’aga autū lena o le fa’atuai.

I le tolopoina lata mai, sa talosagaina ai e le Fa’amasino ia Talasa Atoa-Saaga le mamalu lautele ina ia onosa’i ma tatalo a’o ia fa’amae’a le fa’ai’uga tusitusia.

Sa tumu le potu fa’amasino ma fafo atu o le Fa’amasinoga Fa’aitumalo i le tapuaiga a le mamalu o le atunuu, ma sa faatasi ai ma Sui o le Kapeneta o Samoa na auai atu e lagolago le Palemia.

O le itula e 1 i le aoauli o le asō na matua fa’atalitali iai le to’atele, ona o le fa’amoemoe, o le asō lava e tuuina mai ai le fa’ai’uga.

O le masina o Novema 2025 sa faatoa tuuina atu ai finauga fa’ai’u a loia lea sa faasilasila muamua mo Setema 2025, ina ua talosagaina foi e loia a itu e lua se taimi faaopoopo.

O lo’o molia fa’atasi le afioga ia La’aulialemalietoa Leuatea Polataivao Fosi Schmidt ma lē sa fai ma Minisita Lagolago o Leoleo, Fepuleai Faimata Su’a, faapea ma lē sa avea ma leoleo ia Li’o Fa’ataumalama, o le tamaitai o Lise-Marie Schmidt, faapea Samuelu ‘Sam’ Su’a ma lona faletua Sivai Mamea Kepi.

O nei moliaga e mafua mai i tu’uaiga na alia’e mai i se su’esu’ega i le 2021 i le maliu o le tamaitiiti a’oga mai le NUS ia Tuuau Faasavalu, lea na maliu i se fa’alavelave tau ta’avale (hit-and-run) i le pō ao loma le faigapalota tele o Aperila 2021.

Ua tu’ua’ia e le itu a leoleo (prosecution) e fa’apea na faia e ē ua molia ni fa’amaoniga pepelo ina ia tu’ua’ia ai le Sui Faipule o le itu tete’e, le afioga ia Lealailepule Rimoni Aiafi. 

Na ta’ua e Sam sa iai o ia i lena pō o le fa’alavelave, fa’atasi ma le tei o lona toalua, lea na ia fa’apea mai sa fai se la mafutaga fa’alilolilo. O le molimau a Sam, na la va’aia Lealailepule Rimoni Aiafi ma se tama’ita’i i totonu o se ta’avale Landcruiser lea na mafua ai le maliu o le talavou.

Na tulai Lealailepule Rimoni Aiafi e avea ma tasi o molimau, ma te’ena le tala a Sam, ma tu’uina atu faamaoniaga o le mea sa iai o ia i lea pō (alibi).

E 5 vaiaso na suesueina ai le mataupu, ma sa fuafuaina e vala’auina e le itu a leoleo ni molimau e 76. Peita’i, i le i’uga, e le’i o’o atu i le 30 molimau na vala’auina e molimau i le fa’amasinoga.

O se loia mai Niu Sila ia Richard Marchant sa tulai mo Laaulialemalietoa, faapea Fepuleai Faimata Sua ma Lise Marie Schmidt.

O Maposua Tanya Toailoa sa tulai mo Li’o Faataumalama Auava, ae o Kathryn Dalziel sa tulai mo Samuelu ma Sivai.