Toe Tofia So’oalo Kuresa ma Ofisa Sili o le Pulega o Uafu ma Taulaga a Samoa

O se tamāli’i ua fa’amauina le lava o lona silafia, i le fa’afoeina ma le ta’ita’iga o lea auaunaga a le Mālō, e pine fa’amau ai le $20 Miliona o tupe fa’asili sa toe fa’afo’i atu e le Pulega o Uafu ma Taulaga (S.P.A.)

0
889

(SO’O’UPU A LE MĀLŌ): Ua fa’amaonia e le Kapeneta le toe tofia ai o le Afioga iā So’oalo Falelima Kuresa So’oalo, na te tau’aveina tofiga o le Ofisa Sili o Pulega o Uafu ma Taulaga a Samoa (Samoa Port Authority). 

E to’alua i lāua sa talosaga i lea avanoa, sa faatalanoa ma lagolago ai e le Komiti le afioga ia Sooalo.

Ua tolu ai nei nofoā’iga soso’o ta’itolu tausaga, o ‘ave pea le fa’atuatuaga o le Mālō i le Afioga iā So’oalo, auā le ta’ita’ia o lea itutino tāua o le Mālō e ala i le Pulega o Uafu ma Taulaga. 

O se tamāli’i ua fa’amauina le lava o lona silafia, i le fa’afoeina ma le ta’ita’iga o lea auaunaga a le Mālō, e pine fa’amau ai le $20 Miliona o tupe fa’asili sa toe fa’afo’i atu e le Pulega o Uafu ma Taulaga (S.P.A.) i le Mālō (Dividend) e ui i le tele o lu’itau sa feagai ai ma le Pulega e aofia ai ma a’afiaga o le Koviti – 19. 

O So’oalo fo’i o lo’o taulāmua i le tele o Polōketi o lo’o fa’agasolo i le taimi nei auā le si’itia pea o le auaunaga ma le tautua a le Pulega o Uafu ma Taulaga i le atunu’u lautele. 

Sa galue i le Pulega o le Faletupe o le A.N.Z. i le tele o tausaga ua mavae, ae 15 tausaga o avea ma Ofisa Sili Lagolago mo le Fa’alapotopotoga o Va’a a Samoa (S.S.C.) a’o le’i tofia ai e le Kapeneta na te ta’ita’ia le S.P.A. i le tausaga 2017. 

Na amata a’oa’oina So’oalo mai le Ā’oga Tulagalua a Samauga, Savai’i, soso’o ai ma le Ā’oga Mauāluga a Leififi ma ulufale atu ai i le Kolisi o Samoa. 

Na fa’au’u mai le Iunivesite Aoao o Samoa (N.U.S.) i le tausaga e 2000 i lona Fa’ailoga Tauāloa o le Bachelor of Commerce – Accounting B.Com a’o le 2007 na toe fa’amanuiaina ai fo’i mai lona Fa’ailoga Tauāloa o le Master of Business Administration (M.B.A.) mai le Iunivesite a le Pasefika i Saute (U.S.P.).