Lauga Autu a le Afioga i le Palemia, Tuilaepa Sailele Malielegaoi.
Lau Susuga i le Ta’ita’i o le Sauniga
Sui o le Iuni a Europa i le Pasefika
Sui Mamalu o le Kapeneta
Sui o Malo Faaaloalogia
Ofisa Sili Matagaluega ma Faalapotopotoga
Mamalu o le Auvalaaulia
Ua tala tua valu lau o le fo, ma ua talagã pasina le asõ. Ua lau i ula le taeao toto’a ma le taeao manino, auã le paia maualuga o lenei aso. O le asõ ua tatou potopoto faatasi e molimauina le tatala aloaina o lenei atina’e tãua, o le Fale Faapitoa mo A’oa’oga ma Fa’ata’ita’iga o Galuega Lavea’i ma le Saogalemu.
O le tasi lenei o anavatau o fuafuaga mo polokalame ma atina’e a le Malo, o le faamautu lea o nofoaga e a’oa’oina ai ana aufaigaluega ina ia maua le agavaa ma le tomai ina ia ave le auaunaga lelei ma le atoatoa i le atunuu i taimi o faalavelave faafuasei ma faalavelave matuia.
Ua tele tausaga o taumafai mai lenei faamoemoe, ma o lea sa tali mai ai le ACP EU i lalo o le poloketi o le BSRP i lona tau aofai e 1.06 miliona Tala. O le ata sa tusia e Kramer Ausenco Samoa ae o le galuega sa faatino e le konokarate a le Westerlund Construction.
O lenei atina’e ua i ai ni potu ua faatotogaina i masini faatekonolosi, o potu faapitoa mo le teuina o meafaigaluega tau lavea’i, faapea molĩ e ola i le la mo le sefeina lea o le eletise, faapea ni potu mo ofisa, i totonu foi o lenei nofoaga ua i ai ni vaega faapitoa auã a’oa’oga mo le tineia lea o mu, e faaaoga ai metotia tinei mu faaonaponei, ae faatumauina le saogalemu o le aufaigaluega.
O le vaai mamao a le Malo i tulaga ma vaega uma ina ia lava tapena ma sauniuni auã le tali atu i faalavelave. O le saogalemu ma le puipuiga o le atunuu o le autu lea o polokalame ma fuafuaga faataatitia uma, e mafai ona aoaoina ai le aufaigaluega a le Ofisa o le Tineimu ma ana paaga i metotia ma auala e faaaoga i galuega lavea’i mo soo se ituaiga faalavelave.
O le taimi muamua lenei ua fausia ma faamautu ai se nofoaga mo aoaoga faapenei i le atunuu ma e lagona ai le fiafia ma le faafetai i le Matagaluega o Punaoa Faalenatura ma le Si’osi’omaga ma le Ofisa o Tineimu i galuega faatino ua fausia.
E momoli le faafetai faapitoa i le sui o le Iuni a Europa (EU), Jenny Brown mo le faatupeina o le atina’e, faafetai ia Aumua Audrey ma le Ofisa Tutotonu o le Pasefika (SPC) mo le lagolagosua i atina’e faatino a le tatou Malo.
O lea e faamae’a atu ai se faamatalaga, ua tatala aloaia nei le tratou maota ne ii Tuanaimato.
Soifua ma ia Manuia.
