Faa-Samoa

Tālia se Ta’otoga Fa’apitoa i le Tino Maliu o Maddy, e Faamautinoa ai le Mafuaaga o lona Maliu

September 9, 2026

743

O le’i maua se faamatalaga mautu i le mafua’aga o le maliu ai o Mateo “Maddy” Peseta Kofe, 44 tausaga o Sinamoga, lea o loo masalomia sa faaoolima iai leoleo a’o faatino se latou osofa’iga i le maota o le aiga o lē ua maliu, i Sinamoga.

O le Aso Faraile 28 Aukuso 2026 sa faatino ai se osofai’ga a leoleo, ma latou ulufale ai i le fale o le Mateo poo Maddy, o se alii sa molia muamua e leoleo ma taofia mai ia Tesema 2025.

Peitai, na maliu Maddy i le aso sa osofaia ai e leoleo le maota o lona aiga i Sinamoga i le Aso Faraile 28 Aukuso 2026.

E le o mautinoa poo lea tonu le mafuaaga o le maliu. Ae pau le itu ua mautinoa, sa valaau e leoleo le taavale a le falemai poo le ambulance.

Sa tali atu iai le Pulega o Tineimu ma Faalavelave Tutupu Faafuase‘i (FESA). Sa agai atu le FESA i le maota o le aiga o Maddy i Sinamoga, i le itula e tolu (3pm) i le aoauli o le Aso Faraile lava lea.

Ina ua fesiliga le Afioga i le Sui Komesina o Leoleo ia Leiataua Samuelu Afamasaga i le vaiaso nei mo se tala lata mai, sa ia saunoa mai, o loo faagasolo suesuega i le maliu o Maddy, ma e leai se mea o natia i suesuega a leoleo.

Saunoa Leiataua, “O le case lena a Sinamoga o lea e faagasolo suesuega, ma e le laititi suesuega o loo faatautaia, ina ia mautinoa e faamaoni leoleo na faia le osofaiga..”

E le’i maea suesuega a leoleo i le maliu ai o Mateo “Maddy” Peseta Kofe, ao faatino le latou osofaiga i le fale le aiga i Sinamoga.

“Ia mautinoa e leai ni soligatulafono, leai ni faaoolima, ma e leai se mea o natia i suesuega a leoleo…”

Saunoa foi le Sui Komesina, o loo taofia nei le tino maliu o Maddy, e talia ai le faatinoga o se taotoga faapitoa, “ona iloa ai lea o le mafuaaga o le maliu.”

Sa faapea mai fo’i le tali a le afioga i le Sui Komesina, sa iai le aufaigaluega a le FESA poo le ambulance i le taimi na tulai mai ai le faalavelave, ma o le a mafai ona latou molimau ma le faamaoni i le mea sa tupu.

“O la foi sa iai tagata e le o ni leoleo.”

Sa faapea mai foi le Sui Komesina o Leoleo, sa oso se mai o Maddy i le taimi na faagasolo ai le osofaiga a leoleo.

“Ina ua fai le galuega a leoleo sa vaaia pei e oso sona ma’i ma sa valaau ai loa le ambulance a le FESA..”

“O la foi na iai tagata e pei o le FESA e le o ni tagata faigaluega a leoleo, ma isi tagata sa molimauina..”

“Sei vagana ua faalogo se isi sa i totonu o le fale, sa fai ni soligatulafono e leoleo, o la e matala lava le avanoa e o atu ai e taú atu ona faatino foi lea o le moliaga.”

Avanoa Faigaluega