Tusia: Taunuuga Toatasi, Sooupu a le Malo. Ua ata mai nisi o suiga o loo faatino nei e le Pule Sili fou o le Matāgaluega o ‘Āoga, Ta’aloga ma Aganu’ – e aofia ai le faamuta o le suega SPELL mo le Vasega 2, faapea foi ma suiga i le umi o kuata faaleaoga (school terms).
O lo’o ta’imua le afioga i le Ofisa Sili iā ‘Aeau Chris Hazelman i nei suiga, e pei ona ia folasia i se feiloā’iga ma Sooupu a le Malo.
O le lava tapena o alo ma fanau o le atunu’u mo le latou soifua a’oa’oina lelei, ua fa’atulaga mai ai e le matagaluega nei suiga.
O suiga i kuata faaleaoga lea o le a tai 10 ai vaiaso kuata muamua, lua ma le tolu, ae 8 vaiaso o le kuata mulimuli.
O le naunautā’iga a le Matāgaluega, e pei ona saunoa iai le Pule Sili, ia ‘aua ne’i iai se fa’aletonu i le ola a’oa’oina o fanau.
“Mo kuata fa’alea’oa’oga, i tausaga ua tuana’i, e 15 vaiaso o le kuata muamua, ma ua fai si umi tele o ia vaiaso..
“Ae a tū’ua, e toe a’e atu ae toe mālōlō fo’i ona o nisi o aso fa’apitoa..
“A’o le taumafaiga a le Matāgaluega, ia ‘aua ne’i poloka le fa’atinoga o ‘āoga a le fanau, a o’o loa i le taimi e a’e ai, fai loa ‘āoga nai lo le fa’atoā a’e atu ae toe mālōlō fo’i.”
“O le Aso 06 o Fepuari 2023 o le a toe a’e uma ai ‘āoga a le Malo, ma e 10 vaiaso o le a fa’atautaia ai a’oa’oga mo fanau i lenei kuata, ua ‘ese mai le tausaga ua mavae lea sa 15 vaiaso.
“O le kuata muamua, lua ma le tolu e ta’i 10 vaiaso e fa’agasolo ai ‘āoga ae ta’ilua vaiaso e tu’ua ai. Ae o le kuata mulimuli poo le kuata fā e valu vaiaso e faia ai le ‘āoga, ae valu foi vaiaso e tu’ua ai e aofia ai le Kerisimasi ma le Tausaga Fou. Ae o fai’āoga e lima vaiaso e mālōlō ai.”
O le su’ega o le S.P.E.L.L. e pei ona tā’ua e Aeau, ua toe iloilo totoa e le tatou Matāgaluega aemaise i latou sa nafa ma su’ega nei, ma maua ai e tele lava lape i le taimi na fa’atino ai lea su’ega.
“O le su’ega lea e lē o se su’ega tusitusia, e fa’atino sa’o lava e le fai’āoga ma le tamaitiiti ‘āoga.
“A fa’apea e 15 i le 20 minute e fai ai su’ega i le tamaitiiti e to’atasi, ae 50 tamaiti o lea vasega, o lona uiga e o’o atu i isi fanau ua lē fia auai i le umi o le taimi e fa’atali ai ma o se tasi lea o fa’afitauli ua manatu ai le pulega, e sili ona tu’u.”
“O le itu sili ona lelei, o lea ua ta’oto le ata, ae toe fo’i i tua e fa’atino lava a’oa’oga masani a le tausaga muamua, lua ma le tolu (Level 1, 2 & 3) e fa’amasani ai tamaiti i Polokalame Fa’alea’oa’oga ona fa’atoā su’e ai lea pe a o’o atu i le Tausaga Fa.
Saunoa ‘Aeau, o le tausaga fo’i lenei o le a amata su’e ai fanau mai le Tausaga Fa ma le Tausaga Lima i le su’ega o le National Exam ae o lo’o fa’aauau pea su’ega o le S.N.J.S.C. (Samoa National Junior Secondary Certificate) mo le Tausaga 10 (Level 10).
(0)
