Saunoaga Faapitoa a le Afioga i le Sui Palemia Hon. Tuala Tevaga Iosefo Ponifasio

0
33

O lea ua to’a i tafa’ilagi toega o malama o pupula, ae fa’ailo i atu tia ma tuasivi le fuā manusina, ina ua māgoto le igafo. E afua mai i le segisegi o le taeao le agalelei ma le pule fa’asoifua a lo tatou Atua Silisili ‘Ese, ae sufi e tafa felofelo o le afiafi lona fa’amaoni.

Ona sa’afi lea o lē na fa’au’uina, lo’u agaga e, ia e fa’amanū atu i le Ali’i, o mea uma fo’i ua i totonu iā te a’u, ia fa’amanū atu i lona Suafa Pāia. O le tatou taulaga molia lea, e sula ai le alofa ma le agalelei tau mulimuli o lo tatou Atua Soifua.

Ae ta’oto ia fa’amaene o tai loloto pāia o lenei aso, auā o lea ua mapu i Ōloga le fa’asouga a tupu nai le malae o le vavau, ae laolao i fale le suafa o le tausala, ina ua lalafo i lumāmea le ātamalu o ali’i.

Afio Lana Afioga i le Ao Mamalu o le Mālō o Samoa, Afioga Tuimaleali’ifano Va’aleto’a Sualauvī II ma lau Masiofo, afio lau Afioga i le Sui o le Fono a Sui Tofia ma lou Faletua.

Afifio afioga i Minisitā o le Kapeneta fa’apea Minisitā Lagolago, afio lau Afioga i le Fofoga Fetalai, Sui Fofoga Fetalai, ma Sui Mamalu uma o le Palemene o Samoa.

Afio le Afioga i le Fa’amasino Sili ma Fa’amasino o le Fa’amasinoga Mauāluga, afio fo’i lau afioga i le Peresetene ma le Sui Peresetene tainane le mamalu i Fa’amasino o le Fa’amasinoga o Fanua ma Suafa, Susū susuga i Fa’afeagaiga Taulagi i so’o se Fata Faitaulaga, o lo’o fa’a-fale-le-malu i so’o se tafa o Samoa aemaise le lalolagi atoa. Oi latou ia o lo’o tau asuina le ipuvai o le ola i totonu o afio’aga, ekalesia ‘ese’ese auā se manuia o Samoa ma ona tagatanu’u mo a taeao.

Ou te fa’atalofa atu i le fa’afofoga maimoa mai a si o tatou atunu’u i lenei aso.

O loo fa’aauau pea galuega a le tatou Mālō ma faiga fa’ai’uga a le Kapeneta i tulaga lautetele o lo tatou atina’e. Ma o tulaga masani o tiute fa’alekapeneta, e tāua lava le fa’ailoa i le pāia o le atunu’u, fa’ai’uga tetele ma nisi fo’i o fa’ai’uga tāua na soālaupule ma fa’ai’ugāfonoina i ana fonotaga i lenei vaiaso.

E pei ona mua’i fa’ailoa atu i lo tatou atunu’u, le fa’amaonia ai e le Kapeneta o tofiga o Ofisa Sili o Pulega mo nisi o Matāgaluega ma Fa’alapotopotoga a le Mālō i le vaiaso na te’a nei, atoa ai ma lenei vaiaso.

Mo le silafia, ua tofia le afioga iā Sautiamaivasa Titimaea Tiotio e avea ma Ofisa Sili o Pulega mo le Fa’alapotopotoga o Fale a Samoa. O le afioga iā Seuseu Dr. Joseph Tauati ua avea nei ma Ofisa Sili o Pulega mo le Matāgaluega o Fa’ato’aga ma Faigāfaiva. Ua tofia fo’i le afioga iā Tuitoga Christina Angela Te’o Faitele, e avea ma Tausi Mavaega mo le Ofisa o Tausi Mavaega a Samoa.

O nei tofiga e ta’i tolu tausaga ma toe iloilo, e tusa ai ma aiaiga o avanoa faigaluega fa’akonekarate a le Malo. E fa’amauina le agaga fa’afetai i Komiti sa fītāituga i le iloiloina o talosaga a i latou sa tusi talosaga i nei avanoa.

E fa’aleoina fo’i le agaga faafetai o le tatou Mālō, i tamāli’i ma faletua sa umia nei tofiga i tausaga e tele ua tuana’i, i lo latou sao tāua ma le tautua lē fa’alogologotigā i lo tatou atunu’u.

E aofia ai le afioga iā Māta’utia Rula Levi, sa ia tau’aveina le tofiga o le Ofisa Sili o Pulega mo le Fa’alapotopotoga o Fale a Samoa mo tausaga e tele. O le afioga iā Tilafono David Hunter sa avea ma Fa’auluuluga o le Fa’alapotopotoga o Su’esu’ega Fa’asaienisi a Samoa (S.R.O.S.) fa’apea ai ma le Matāgaluega o Fa’atoaga ma Faigāfaiva, ma le afioga iā Leaupepe Pelesauma Māta’utia Ropati, sa ia tau’avea le tofiga o le Tausi Mavaega a Samoa i le tele o tausaga ua mavae.

Fa’amālō, fa’afetai le tautua atunu’u, ma le tautua Mālō. O lenei ua magoto le igafo, ma ua tautai a’e lo outou faiva sa outou gāpātia ai. O le tatalo, ia saga fa’amanuia le Atua i lo outou soifua, ma ia fa’aāogaina pea outou mo nisi tofiga ua Ia finagalo i ai i le lumana’i. Fa’afetai ma fa’amālō le fai o le faiva.

Mo i latou ua tofia nei, ia manuia le alo atu i o outou tofiga fou, saga’i ane ai o le lagi auā le tautua mo Samoa.

O loo fa’agasolo pea le auaunaga a le Mālō mo le auina atu o gasegase mo togafitiga i fafo. O le taimi nei, na’o Niu Sila o lo’o auina atu i ai a tatou gasegase mo togafitiga e le’o mafai ona fa’atinoa i Samoa nei.

I le vaiaso ua te’a, e 11 gasegase na fa’amaonia le auina atu mo togafitiga i Niu Sila. O le tele o nei gasegase, o lo’o a’afia i gasegase faigatā e i ai le fatu, kanesa ma isi fa’ama’i tugā.

E pei ona saunoa le afioga i le Palemia iā Novema o le tausaga na te’a nei, e le’o fa’aititia le a’afia o le atunu’u i fa’ama’i ogaoga e lē pepesi. Ma o le tulaga tonu lenā o lo’o maitauina pea e le Kapeneta i vaiaso ta’itasi. Peita’i o le tele o nei fa’ama’i, e afua mai i le itu’āiga soifuaga ua o tatou soifua ai nei, ma taumafa o lo’o taumamafa ai le atunu’u.

Ua maitauina fo’i, ua fa’asolo ina talavou le soifua o i latou ua a’afia i nei fa’ama’i ogaoga. O se vala faigatā lea mo se atunu’u laitiiti e pei o Samoa ma le taumafaiga o lona atina’e mo nei ma le lumana’i. O le ‘upu moni, e fa’alagolago le lumana’i o le atunu’u i ona tupulaga fai a’e, auā le fa’aauauina o ā tatou galuega o lo’o fa’atino nei. Peita’i, afai e ponatia tupulaga talavou i gasegase ogaoga i lo latou soifuaga mu’amu’a, o le a fai ma fa’afitauli fou gatā mo latou i le lumana’i.

O le puipuiga o le atunu’u mai nei fa’ama’i, o se matāfaioi faifa’atasi a le atunu’u atoa. E lalago fa’atasi ai fuafuaga a le Mālō, e tauala atu i le Matāgaluega o le Soifua Mālōlōina, ma le Pulega Mamalu a Ali’i ma Faipule, Komiti a Tinā, Faletua ma Tausi, Sa’oao ma Augafa’apae. Aea le fesoasoani a Fa’alapototoga Tumā’oti, Ekalesia ma ‘Āoga.

O le mau tau’ave fa’alesoifua mālōlōina, e sili le puipuia, nai lo le tau togafitia. O le agaga lea o le tatou Mālō.

Ua fa’amaonia e le Kapeneta i lenei vaiaso, le fa’aopoopo o le isi $5 miliona, e fa’aauau ai le fa’atupega o le Polokalame mo le auina atu o gasegase mo togafitiga i fafo, mo masina o totoe o lenei tausaga fa’aletupe.

A fua i vaegātupe ua fa’amatu’u atu e le Mālō mo lenei polokalame, ua $16 miliona i lenei tausaga fa’aletupe. O se vaegātupe tele.

O lea, ua fa’atulaga ai e le Mālō ni fuafuaga fou, e fetu’una’i ai lenei polokalame ma vaegātupe fa’aalu, mo le aga’i atu i le lumana’i. O lo’o galulue fa’atasi ai nei le afioga i le Minisitā o le Matāgaluega o le Soifua Mālōlōina ma le afioga i le Minisitā o le Matāgaluega o Tupe fa’atasi ai ma ā la Matāgaluega.

Sa tagofia fo’i e le Kapeneta Lipoti Fa’aletausaga ma tali a le Mālō, i matā’upu na lāgā mai e Komiti Fa’aPalemene.

Ua fa’afofoga Samoa i tauālumaga o le Fono Usu a le Palemene i vaiaso e lua ua tuana’i atu, sa iloilo ai Lipoti Fa’aletausaga ma tali a le Mālō i matā’upu lāgā mai lipoti. O se tulaga lelei tele lea i le fa’afofoga mai a le pāia o le atunu’u, i felafolafoā’iga a Sui Mamalu o le Palemene i galuega fa’atino, ma matāti’a na ausia e Matāgaluega ma Fa’alapotopotoga a le Mālō, faapea ma Ofisa fa’a-Fa’avae, e tusa ona aiaia i le Tulafono o Tupe 2001.

O lo’o to’esea le afioga i le Ta’ita’i o le Mālō, afioga i le Palemia mo Lonatona auā le Fonotaga a Mālō o le Taupulega, ma o lo’o i ai nei i Ausetalia mo lana malaga aloāia fa’alemālō ma feiloa’i ai ma le Ta’ita’i o le Mālō o Austetalia, le Palemia iā Albanese. Ua i ai le fa’amoemoe, pe a tusa ma le finagalo o le Atua, e toe taliu mai le faigāmalaga a le afioga i le Palemia i le fa’ai’ua o lenei vaiaso.

Ua toe taunu’u manuia mai i fanua le afioga i le Minisitā o le Matāgaluega o Pisinisi, Ālamanuia ma Leipa, iā Leatinu’u Wayne So’oialo, sa feagai ma togafitiga o gasegase i Niu Sila. O le vi’iga ma le fa’afetai i le Atua, ona o lona agalelei ua mafai ai ona fa’afo’isia le soifua laulelei o le afioga i le Minisitā i se tulaga manuia.

O lo’o fa’agasolo pea le fa’amae’aina o le toe iloiloina o Faiga Fa’avae a le tatou Mālō, i le va feagai ai o Samoa, Niu Sila ma Ausitalia i le fa’atinoga o le Polokalame o Galuega Fa’avaitaimi.

O le autū o le toe iloilona o lenei Faiga Fa’avae, ina ia mautū lelei manaoga o Samoa i lalo o lenei Polokalame, ma manino aiaiga mo le fa’afaigaluega ai o ā tatou tagata, pe a malaga atu mo galuega fa’avaitaimi i ia atunu’u.

Mulia’i, fa’ataunu’u lea o ni fa’atalanoaga ma a tatou pa’aga i Niu Sila ma Ausetalia, mo ni aiaiga fou, ina ia mausalī le fa’atinoga o lea polokalame, auā fa’amanuiaga mo na atunu’u ae fa’apea fo’i ma Samoa.

O lo’o fa’aauau pea faigāmalaga i lisi faatalitali a le tatou Mālō iā Aperila ma Me. O lo’o i ai fo’i ni fetu’utu’unā’iga i Niu Sila, i nisi o alo ma fanau, ua lē mafai ona fa’aauau galuega ona o le afā tele o Kapilielu (Cyclone Gabrielle), sa a’afia ai togālā’au, sa mafai ona fa’afaigaluega ai pea i latou, i nisi vaega o galuega i isi Kamupanī se’ia mae’a taimi fa’atulagaina o ā latou konekarate.

E amata i le masina fou ona tu’u atu le filifiliga o i latou, e auai i galuega fa’avaitaimi i nu’u ta’itasi, e tauala atu i Fono Fa’avae a Itumālō, latou te filifilia ai a latou tagata, e tatau ona malaga atu mo galuega fa’avaitaimi i Niu Sila ma Ausetalia e tusa o aiaiga fa’aletulafono. E tumau pea le fa’afoeina o nei malaga i le fa’amalumaluga a le Mālō.

Ua taunu’u nei i se tulaga lelei le fa’afouina o laisene pisinisi, talu ona fa’amamalu le tatou Tulafono Fou o Laisene Pisinisi iā Tesema 2022. Ua toe fa’aleleia atili ai fa’amaumauga a le Matāgaluega i fa’amatalaga o pisinisi ta’ito’atasi, e uiga i a’i latou moni e ana pisinisi, ma i latou o lo’o i ai lafoga tu’ua, ma i latou tonu e tatau ona totogi a latou lafoga i le tatou Mālō.

O nisi e ana pisinisi e i ai faleoloa, o lo’o talosaga mai fo’i mo laisene e fa’atau ai le ‘ava malosi ma ua faigofie ai fo’i le galuega a le Pulega o le ‘Ava Malosi iā latou iloiloga i talosaga, ona ua mautū fa’amaumauga o nei pisinisi i le tatou Matāgaluega o Lafoga i a’i latou tonu lava e ana pisinisi.

O le agaga o le Mālō, ia fa’atupulā’ia pea le atina’e o pisinisi i Samoa auā manaoga fa’atauvā i le va o lea pisinisi ma lea pisinisi, e maua ai le pa’ū i tau o oloa mo tatou tagata, ae ia tausisia ai pea le fa’amaoni i le resitalaina o i latou tonu e ana pisinisi nei.

Talosagaina le mamalu o le aufaipisinisi ma Samoa atoa, afai o i ai ni au pa’aga e le’o ni tagatānu’u moni o Samoa aemaise pe a leai ni pemita e galulue ai i Samoa ma fa’atino pisinisi o lo’o outou galulue fa’atasi ai, fa’amolemole e tāua le fa’ailoa mai i le Matāgaluega, ne’i a’afia lau pisinisi, a’afia ai ma oe e tusa ma ala o le Tulafono.

E ‘ave lava le fa’amuamua a le Mālō i pisinisi a ō tatou tagata, ona o le puipuiga o le tamāo’āiga o Samoa ma ona tagata, ma ona ‘ele’ele auā le lumana’i.

O lo’o sologa lelei le fa’atinoina o le Polōketi o le Miliona a le tatou Mālō, lea o lo’o galulue fa’atasi ai Komiti Fa’afoe ma le Matāgaluega o Tinā ma Tama’ita’i, Atina’e o Nu’u ma Agafeso’ota’i (M.W.C.S.D.).

Ua maitau pea le tu’uina atu o nisi o nei vaegātupe i Itumālō ua mafai ona fa’amalieina aiaiga mo le fa’amatu’u atu o seleni ua atofaina. O lo’o va’aia pea le fa’atuai ona tu’uina mai o fuafuaga ma polokalamae o Polōketi a nisi o Itumālō, ua mafua ai ona tuai ona fa’amatu’u atu e le Matāgaluega o Tupe a latou seleni.

O lo’o aga’i pea i luga le mauāluga o le aoina o tupe maua a le Matāgaluega o Tiute ma Tupe Maua e ala lea i lafoga tu’ua ma tiute. E fa’afetaia ai si o tatou atunu’u i le lagolagosua i galuega fai a le tatou Matāgaluega e tusa o lipoti ma le totogiina o lafoga e aunoa ma se fa’amalosia.

O vaega tetele ia, sa aga’i i ai le fa’atōfālā’iga a le Kapeneta, ma fai i ai ana fa’ai’uga i lenei vaiaso.

O lea fo’i ua tau fa’ai’ui’u lenei masina o Mati, ma tatou aga’i atu ai i le fa’amanatuina o le Eseta i le amataga o le masina fou.

Ia manuia le tapuā’iga i le pāia o le atunu’u. Fa’afetai atu fo’i i le au fai tatalo mo le talosia o galuega o lo’o fa’atino e le tatou Mālō ma le aufaigaluega, auā le tautuaina o Samoa.

Manuia tele le fa’ai’uga o lenei vaiaso i faiva ma tiute o lo’o feagai ai ma Samoa aoao.

Soifua ma ia Manuia!