Saunoaga Faamanuia a le Afioga i le Palemia: Fiame Naomi Mata’afa mo le Tausaga Fou 2024

0
624

O lea ua to’a i faga ma a’e i fanua le sā na tiu i tai tetele, ina ua magoto le igafo ma ifo le malama. A’o lea ua sulu i ulugalu ma matā fanua le pupula mali’o lagi o le fetū ao, e fa’afeiloa’i le ulua’i la o le tausaga fou.

Le Atua e, ua malie pule, ua malie mālō. O lau pule lea ua tōtō tetele, ua o matou sapaia fa’atua’ele’ele. O le taeao ma le afiafi o le aso lea. A’o le matagofie o le alofa tunoa o le Atua, ua mafai ai ona o tatou aulia fiafia le fa’ai’uga o lenei tausaga 2023, ma fa’afeiloa’i ma le manuia le tausaga fou, 2024.

Ou te fa’atulou atu i le afio o lau Afioga i le Ao Mamalu o le Mālō ma lau Masiofo, Afio le Sui o le Fono a Sui Tofia ma lou Faletua, Afio le Sui Palemia ma Minisitā o le Kapeneta, fa’apea Minisitā Lagolago. Afio lau Afioga i le Fa’amasino Sili ma Ali’i ma Tama’ita’i Fa’amasino, Afio lau Afioga i le Fofoga Fetalai ma Sui Mamalu o le Palemene. Sui o Mālō mai fafo. Fa’auluuluga o Matāgaluega ma Fa’alapotopotoga Tumā’oti.

Le pa’ia o Ta’ita’i o Ekalesia aemaise le Aufaigaluega Totofi a le Atua i le nofo a Ekalesia Kerisiano i Samoa.

Ae a le pa’ia mauāluga o Samoa. O pa’ia auā ‘Āiga ma a latou Tama, O Tama ma o latou ‘Āiga, Tumua ma Pule, Ituau ma Ālataua, ‘Āiga i le Tai ma le Va’a o Fonotī.

Ou te fa’atulou atu fo’i i le tapuā’iga a Tutuila ma Manu’a. I le afio o le Kovana ma le Faigāmālō i le Pulega Fa’atonu, le Fa’amasinoga, ma Maota e lua o le Fono Faitulafono a Tutuila ma Manu’a.

O le pa’ia lea auā le Faleagafulu ma le Nofo-a-Ma’opū, Sua ma le Vaifanua, Fofō ma Āitulagi, Ituau ma Ālataua, Saole ma le Launiu na Saelua. Le afio o Fa’atuiolemotu, Le Lā’au na amotasi, Alalata’i to’oto’o o le Fale’ula ma ‘Upu i le Manu’atele.


Book Now. Visit www.tivoliaparthotelsamoa.com 

Ua fa’afofoga le atunu’u i le Malelega a Lana Afioga i le Ao Mamalu o le Mālō mo le Kerisimasi. O le feau tau molimoli e fa’alototeleina ai le ‘au fa’atuatua, ‘aua le atuatuvale, auā o lo’o soifua lo tatou Ali’i Fa’aola, o Ia na soifua mai mo lo tatou fa’aolataga.

Ua afulelea lenei tausaga, ua silimea fo’i le seuga i galuega sa feagai ai si o tatou atunu’u, o Kamupanī ma pisinisi fa’apea le tatou Mālō. Fa’amālō le fai o le faiva, fa’afetai le ta’i.

E leai se galuega e lē tauia, ma o le mau tau’ave a Samoa, o nei, e tapena ai taeao, ma e tautala aso ma pine ona lagi soifua. E pei ona fa’ata’oto i le Ta’iala mo le Lumana’i Manuia o Samoa, le fa’atāua o le sao o tagata uma i so’o se atina’e mo le manuia lautele. O le agaga mauāluga lea, o lo’o ta’ui ai atina’e ma fuafuaga lautetele a le tatou Mālō mo le lumana’i.

Check these out at Le Well

O le fa’amoemoe lea o lo’o lalago ma ta’iala ai le tatou polokalame mo le atina’e o Itumālō e ala i le miliona tālā. Ae fa’alagolago i lo tatou nutimea fa’atasi i le unā’ia o auala talafeagai uma, e si’itia ai le atina’e o Itumālō, afio’aga ma alalafaga. O nei fa’atinoga uma, o lo tatou sao fai fa’atasi lea mo le atina’e o si o tatou atunu’u.

O lo’o lauāluga pea i le tatou Mālō, le fa’amuamua o le atina’e o le soifua mālōlōina ma a’oa’oga. E itiiti si o tatou atunu’u, ma o so’o se tatou taumafaiga e si’itia ai le atina’e o le tamāo’āiga ma le soifua laulelei o le atunu’u, e fa’amoemoe i le soifua mālōlōina, ma le a’oa’oina o ō tatou tagata.

E fa’apea fo’i ona tāua le si’itia o isi auaunaga uma a le tatou Mālō e tautua ai le atunu’u. Ma e fa’amoemoe i le maopoopo o le aufaigaluega a le Mālō, e galulue so’oso’otauau ai ma le vaega tumā’oti ma a tatou pa’aga, aemaise o nu’u ma afio’aga.

E fa’atāua fo’i le saogālēmū ma le puipuia o si o tatou atunu’u. E le gata ia malu ma saogālēmū lo tatou lotoifale, ae fa’apea fo’i i o tatou tuāoi fa’avāomālō. Ua tele lu’itau ma a’afiaga ua a’afia ai le lalolagi aemaise lenei itulagi i suiga ogaoga o le tau, o vesiga ma taua, fa’ama’i pepesi, aemaise fe’ese’ese’ā’iga i manatu o Mālō tetele ma tauau ina nunu ai le to’au o le nofo lelei o atunu’u o le lalolagi. O nei vala uma, o lo’o mata’itū lelei e le tatou Mālō i tulaga tau i le va i fafo.

O lo’o fa’aauau pea le feso’otā’iga vāvālalata ma Mālō o le lalolagi ma tatou pa’aga o lo’o tatou va’ava’alua i le atina’e o le atunu’u. O le sainia ai o le Feagaiga i Samoa nei (Samoa Agreement) ma Mālō o le Iuni a Europa, Aferika, Karipiane ma le Pasefika iā Novema o le tausaga nei, o se tasi lea o matāti’a iloga mo Samoa aemaise lenei itulagi. O feso’otā’iga vāvālalata ia o lo’o unā’ia ai le talanoaina o matā’upu tau i le atina’e o le tamāo’āiga, fefa’atauā’iga, puipuiga ma le saogālēmū, aemaise le tali atu i suiga ogaoga o le tau.

Available from SOS. For all your party and events.

E le’o itiiti le fa’atāua a le tatou Mālō i le fa’atumauina o pulega lelei ma le tausisia o Tulafono ma Faiga Fa’avae o lo’o fa’afoe ai galuega uma. O ni suiga fo’i e fa’atula’i mai iā tatou Tulafono, e fa’avae i le ‘au’au autū, ina ia saga fa’aleleia ma fa’amausalī tulaga fa’aletulafono e limata’ita’iina ai galuega a le Mālō.

E ma’eu le sao o ā tatou tamafanau i tauvaga o ta’aloga fa’avāomālō i lenei tausaga. Na mauāluga tulaga na ausia e le tatou ‘au na masi’i i ta’aloga a le Pasefika na fa’atinoina i Solomona. E fa’apea isi ta’aloga fa’avāomālō sa auai atu i ai a tatou ‘au. O le agaga o le tatou Mālō, ia si’itia matāti’a e ausia e ā tatou tamafanau i so’o se ta’aloga fa’avāomālō e tauvā ai. E ao ai ona fa’atāua le saga tapu’eina o le atina’e o ta’aloga i le atunu’u, auā a maopoopo le lotoifale o ta’aloga, o le lelei fo’i lea ona fa’afoe o ‘au masi’i a le tatou atunu’u.

O le sa o Samoa, e fau tele. O le tele o sulu e maua ai figota. Ma e lē mafai e le Mālō ona tau’ave pito tasi le galuega mo lo tatou atina’e ma le manuia lautele o ō tatou tagata. E fa’amoemoe i lo tatou oloolo pitova’a, ma lalafo i le Atua a tatou fuafuaga uma, o Ia na te fa’atonu folau a tatou galuega.

O le mea lea, e lē tu’ua ai le agaga fa’afetai o lo tatou Mālō i si o tatou atunu’u. E afua mai le Pule mamalu o Ali’i ma Faipule ma itutino uma o faigānu’u. Fa’afetai atu i lo outou fatu’āiga tausi, ma la outou ta’ita’iga e ala i galuega uma sa va’ava’alua ai ma lo tatou Mālō mo le atina’e manuia o le atunu’u.

Ou te fa’afetaia le sao o tatou pa’aga mai fafo. Ua 61 tausaga o folau fa’atasi pea Samoa ma ana pa’aga mai fafo. Fa’afetai mo lo latou sao tāua i si o tatou atunu’u.

Ou te fa’afetai atu i le aufaigaluega a le Mālō i ona itutino ‘ese’ese, fa’apea Kamupanī ma Fa’alapotopotoga Tumā’oti uma i le atunu’u. Mālō le galulue, fa’afetai le fa’atoatoa. O le tatalo, ‘aua ne’i mavae le lamepa o le fa’amaoni ma le alofa, ma ia tupu tele lo outou lototele e tali lo outou valā’auina e tautua si o tatou atunu’u. Ia saga fa’amanuia le Atua i o outou faiva.

O lea o lo’o loma le tatou taligāmālō tele iā Oketopa o le tausaga nei. Mo le taimi muamua o le a tatou talimālō ai i le Fonotaga a Ta’ita’i o Mālō o le Taupulega, ma o se fa’amoemoe tele lea o le a malaga mai ai le to’atele o Ta’ita’i o Mālō, e aofia ai ma le Fa’auluuluga o Mālō o le Taupulega – le Afioga i Lana Maiesetete, le Tupu o Peretania iā Salesa le III ma lana Masiofo.

Le atunu’u e, e tāpā ma le fa’aaloalo e le tatou Mālō la outou lagolagosua i lenei fa’amoemoe tele. E fa’apea fo’i i le vaega tumā’oti, o Kamupanī ma pisinisi, ma a tatou pa’aga.

Le pa’ia o Ta’ita’i o Ekalesia, ma le Aufaigaluega Totofi a le Atua i Samoa nei ma atunu’u e mamao, e lē mavae le agaga fa’afetai i lo outou faiva o le tatalo mo si o tatou atunu’u. E tutupu pea matagi i liu o va’a i la tatou savaliga, peita’i, o lo tatou malu, ma lo tatou ‘olo mauāluga, o le Atua.

O le ala lea o le fa’aauau pea o le fa’atāuaina e le Mālō o le vaiaso o Tatalo ma Anapogi i le atunu’u atoa, e galulue fa’atasi ai ma le Fono a Ekalesia So’ofa’atasi, tatou te aufa’atasi ai e momoli talosaga ma anapogi i luma o le Atua, ina ia puipui mai ma apelepele le atunu’u i ona ‘ā’ao alofa.

Ua atofaina ai le Aso Sa, 7 o Ianuari e fa’amauina ai le vaiaso o Tatalo ma Anapogi i le atunu’u se’ia o’o atu i le Aso Faraile, 12 o Ianuari 2024.

Samoa e, ia ta’ita’i pea e le Atua lo outou soifua laulelei ma so matou ola i lenei Tausaga Fou, e ala i lona alofa tunoa ofoofogia ma lona fīlēmū.

Ia manuia le Tausaga Fou.

Soifua.