Saunoaga Autū: Minisitā o le Matāgaluega o Soifua Mālōlōina

0
1028

“Fa’amanatuina o le Aso Fa’apitoa e Fa’atāua ai le Fa’alogo”

Lau Susuga i le Fa’afeagaiga, Reverend Semikueva Fa’atoafe, Lau susuga i le Komesina o le MālōAusetalia, Mrs. Emily Luck, Sui Mamalu mai le ‘Āoga Fa’afoma’i, Royal Australian College of Surgeons Lau Afioga i le Fa’atonu Sili Aoao o le Matāgaluega o le Soifua Mālōlōina, iāAiono Dr. Alec Ekeroma.

Fa’apea le pāia ma le mamalu ua aofaga potopoto mai i lenei itu aso.E iā te a’u le agaga fiafia tele e fa’afeiloa’i atu ai i lo outou mamalu ua afifio mai, tatou te fa’amanatuina fa’atasi lenei aso ua fa’atāuaina e le lalolagi, ua fa’aigoaina, “O le Aso Fa’apitoa mo le Fa’atāuaina o le Fa’alogo ile Lalolagi (The World Hearing Day).

Please Keep our Beautiful Samoa Clean. Faamolemole – aua le tiaiina lapisi i autafa o tatou aualatetele. 📷 SGN.
O se feau tāua mai le auaunaga a le Ofisa o Turisi, STA.

O le sini autū mo lenei tausaga e fa’apea: “Tausiga o Taliga ma le Fa’alogo mo Tagata Uma: Ia Tatou Fa’atinoina ina ia iloga lona tino mai” “Ear and Hearing Care for All! Let’s make it a reality”.Ua fa’amauina, e silia ma le 1.5 piliona tagata o le lalolagi ua fa’aletonu la latou fa’alogo, ae lalata i le 430 miliona i latouua i ai a’afiaga tumau o le logonoa. O le to’atele oi latou ua fa’aletonu le fa’alogo, e mai atunu’u tau atia’e ma atunu’u e vaivai le tamāo’āiga, e aofia ai ma Samoa; ma e āfua mai i le utiuti o avanoa e maua ai auaunaga ma togafitiga.

E i ai le talitonuga o le au popoto, o le a si’itia le numera oi latou e a’afia lo latou fa’alogo i le lumana’i, ona o tulaga o i ai le fa’atupulā’ia o fa’afiafiaga fa’atino e fa’aāoga ai masini fa’aleotele leo i totonu o le atunu’u, fa’apea fo’i ma fofoga po’o taliga fa’aletonu (tulou) e le’o mafai ona auina mai i le falema’i e togafitia.

O le tulaga e fa’anoanoa ai, o mafua’aga ma fa’apogai o le a’afia ai o taliga ma fa’aletonu ai le fa’alogo, o vaega e mafai ona puipuia ma togafitia. O le 60% o fanau ua a’afia taliga ma fa’aletonu ai le fa’alogo, o tulaga nei e mafai ona fo’ia, i le fa’atinoga o auala fa’alauiloa ma puipuiga fa’asoifua mālōlōina lautele, fa’apea ma togafitiga talafeagai. A lelei ona fa’atino auaunaga uma mo le soifua mālōlōina o taliga, o le a fa’apea fo’i ona si’itia le tulaga lelei o le fa’alogo o le mamalu o le atunu’u.

I le Fono Tele a le Soifua Mālōlōina a le Lalolagi (World Health Assembly) i le 2017, na fa’ailoa ai le tausiga o taliga ma le fa’aletonu o le fa’alogo o se matā’upu tugā tau le soifua mālōlōina lautele i le lalolagi, ma na fautuaina ai atunu’u uma ina ia fai le Aso 3 o Mati i tausaga uma, o se aso fa’apitoa e fa’atāua ai le Soifua Mālōlōina oTaliga ma le Fa’alogo, e pei ona i ai le asō.

O le ‘auga ma le fa’amoemoe ina ia:

• unā’ia le fa’alauiloa o auaunaga o le soifua mālōlōina lautele mo le tausiga o le soifua mālōlōina o taliga e fa’atumauina ai le lelei o le fa’alogo.

• fa’amalosia le galulue fa’apa’aga e fa’atino auaunaga mo le soifua mālōlōina o taliga

• si’itia le fa’atinoga o auaunaga fa’alauiloa mo le soifua mālōlōina o taliga ma le fa’alogo i so’o se vaega o le atunu’u ma le lalolagi atoa, ma ia

• a’oa’oina lelei o tatou tagata ia tausi lelei le soifua mālōlōina o taliga.

I totonu lava ia o Samoa, ua matuā si’itia le numera o gasegase ua āsia le Vaega o Auaunaga ma

Togafitiga mo Taliga, Isu ma le Fa’aī(ENT Clinic) amata mai le tausaga 2017, ona o tulaga fa’aletonu o taliga e aofia ai:

o 77% o gasegase ua fa’aletonu taliga ma ua faaletonu ai le fa’alogo

o 52% o gasegase ua a’afia taliga i siama

o 7% o fanau sa āsia i ‘Āoga Tulagalua i Upolu nei, ua tugā a’afiaga o taliga.

O fa’amaumauga nei ua fa’amausalīina ai se manatu, ua tatau ona fa’atāua le soifua mālōlōina o taliga e tagata uma.A’o tatou i ai i le fa’amanatuina o lenei aso fa’apitoa i le asō, e avatu ai se fautuaga fa’a-Minisitā o le Soifua Mālōlōina mo i tatou uma, ina ia utagia auala nei o puipuiga, mo le soifua mālōlōina o ō tatou

taliga:

o Taofia le ulaula tapa’a i totonuo ‘āiga, ma ia fufulu mamā lima i taimi uma

o Taumamao mai tagata e tatafe isu, tale ma maua i le fulū

o Vave va’ai se foma’i, pe a lagonaina ua i ai se fa’aletonu i taliga

o ‘Aua le so’ona tu’ua ni meatotino i totonu o ālavai o taliga

o Afai ua fa’alogoina se fa’aletonu i ālavai o taliga, ia vave ona siaki o Ia fa’amalosia le fa’atinoga o tui puipui o fanau i taimi fa’atulagaina ona o tui puipui o fanau, e fesoasoani i le puipuia o fanau mai a’afiaga o taliga, A’o feagai ai ma le fa’amanatuina o le Aso Fa’apitoa lenei mo Taliga ma le Fa’alogo i le Lalolagi, o le a fa’atinoina ai e le Vaega o Auaunaga ma Togafitiga o Taliga, Isu ma le Fa’aī(ENT Clinic), a’oa’oga mo le aufaigaluega i Falema’i Fa’aitumālō uma fa’apea ma Falema’i Tutotonu, i le fa’atinoga o Ulua’i Tausiga ma Auaunaga mo le Soifua Mālōlōina o Taliga.

O le fa’amoemoega o nei a’oa’oga, ina ia si’itia ai tomai ma agava’a o le aufaigaluega i le:

 Fa’afoeina o togafitiga mo gasegase autova’a mai mo auaunaga tau taliga

 Mafai ona iloa le fa’afitauli ua a’afia ai taliga o gasegase, fa’atino i ai togafitiga talafeagai, fa’apea fo’i ma le fa’alauiloa o auala o puipuiga E le gata i a’oa’oga fa’atino mo le aufaigaluega i le fa’atinoga o togafitiga ma auaunaga mo le saogālēmūma le soifua mālōlōina o taliga, ae o se tasi fo’i matāti’a ua fai ma pine fa’amau o lenei Aso Fa’apitoa, o le Fa’alauiloa lea o le mafai e le Vaega o Auaunaga ma Togafitiga o Taliga, Isu ma le Fa’aī, ona fa’atino ana fa’amaumauga e fa’aāoga ai le polokalame o le Tamanu i lalo o le Polōketi o Fa’amaumauga Fa’atekonolosi o le Soifua Mālōlōina (E-Health Project), ma o le Vaega Muamua lenei o le Falema’i, ua ulua’i fa’aāogaina ai lenei polokalame tāua mo le fa’aleleia o fa’amaumauga o gasegase. E fa’afetaia ai le susuga i le ali’i foma’i Dr. Sione Pifeleti ma lana aufaigaluega, e tusa ai ma le taulāmua e fa’atino galuega lelei e lagolagoina ai le fa’atinoga o ā latou auaunaga.

O le fa’aāogaina o lenei polokalame, ua fa’afaigofie ona maua ai fa’amaumauga o gasegase na āsia lea vaega o le auaunaga, o le umi e fa’atali ai gasegase mo le va’aia o le foma’i, o fa’amaumauga o togafitiga fa’apea ma fa’amatalaga patino i le gasegase. E i ai le fa’amoemoe, o le a o’o le fa’atinoga o fa’amaumauga a le Vaega o auaunaga mo Taliga, Isu ma Fa’aī ise tulaga lelei, ma fesoasoani ai fa’amaumauga nei i auala e fa’a’aleleia atili ai le fa’atinoga o auaunaga, ina ia mautinoa o lo’o maua e tagata uma le avanoa tutusa mo nei auaunaga.

E fa’ai’u atu ai se fa’amatalaga, e iā te a’u le agaga fiafia tele, e avea ai fo’i lenei avanoa e tatalaina aloāia ai le Ofisa Tutotonu mo le Su’esu’ega o le Fa’alogo i Samoa (Samoa National Hearing Centre).

O lenei polōketi, sa fa’atupeina e le Mālō o Ausetalia fa’atasi ai ma le lagolago a le ‘Āoga Fa’afoma’i o le Royal Australasian College of Surgeons (R.A.C.S.).

E fa’afetaia ai fo’i le galulue fa’apa’aga ma le Matāgaluega o Tinā ma Tama’ita’i, Atina’e o Aiga, Nu’u ma Aga Feso’ota’i. Matāgaluega o ‘Āoga, Ta’aloga ma Aganu’u ma Fa’alapotopotoga Tumā’oti e pei o le Senese, Nuanua o le Alofa ma le Fiamalamalama ma isi ua le māua o latou igoa.

E momoli atu ai le agaga fa’afetai tele i lo outou mamalu. O la matou tatalo, ia sautualasi fa’amanuiaga a le Atua iā te outou, ma ia i ai fo’i fa’amanuiaga a le Atua i luga o nei atina’e ua tino mai mo le soifua mālōlōina o nai o tatou tagata.

Ia manūteleina lenei aso ma lona fa’amoemoe ile alofa o le Ali’i.

Soifua ma ia manuia.