Ua tatala aloā’ia nei le avanoa mo le atunu’u lautele, o i latou o lo’o aumau i atunu’u i fafo fa’apea Samoa nei, e lesitala ai mo se avanoa e faatau ai shares mo ni vaalele se lua o lo’o faamoemoe iai le Malo mo le faalauaiteleina o le auaunaga a le Samoa Airways.
E pei ona saunoa le afioga i le Palemia le Susuga i le Laaulialemalietoa Leuatea Polataivao Fosi Schmidt i lana feiloaiga ma le vasega o tusitala i le Aso Gafua, o lea ua fa’atino taiala ma fuafuaga uma mo lenei faamoemoe.
“Samoa e, o ai lava o fia fai sea i le tatou va’alele, lea ua tatala le avanoa, e fa’afaigofie ai le tulaga o tatou femalagā’iga, aemaise ai fo’i le tulaga o le i ai o sou sao i le tatou va’alele, o le va’alele a lou atunu’u pele o Samoa.”
Saunoa le Palemia, o lea ua amata ona faatino le lesitala mo i latou uma e fia shareholder i tatou va’alele e lua o loo faamoemoe e aumai.
“Ou te fa’asilasila aloā’ia atu ai, mo Samoa uma iinei ma atunu’u mamao, o lea ua tatala le avanoa.
“E te afio mai, ona fa’amau lea o lou suafa, o lou afio’aga aemaise o le aofa’iga o lau tupe, lea o le ā teu fa’afaigaluega.”
O lenei lesitala, o le ā feagai lea ma le Ofisa o Fa’aputugātupe teu fa’afaigaluega o Mavaega Tausi a Samoa poo le UTOS.
O le tupe fa’avae mo lenei fa’amoemoe, e tusa ai ma faasalalauga muamua, e $500 talā, ae lē faatapulaaina pe afai e te finagalo e fa’asili atu lau seleni e teu fa’afaigaluegaina auā le faatauina o va’alele fa’avāomālō mo Samoa.
Saunoa le Palemia, “Po’o fea lava o le lalolagi o lo’o e afio ai, o le ā mafai lava ona e fesili mai e fa’aāogaina ai le tatou auauanga fa’atekonolosi aga’i i le UTOS.”
“O le fa’amoemoe lenei Samoa ma lau tapua’i mai, ia tatou limalima fa’atasi ina ia manuia le tatou Kamupani Va’alele.
Saunoa Laaulialemalietoa, talu lava ona Tuto’atasi Samoa, e le’i iloga lava ona tula’i le Kamupanī Va’alele a le atunu’u i se tulaga lelei ma le maualuga e tatau ona iai.
“A silasila lelei i le vasa Pasefika, e pei lava o Fiti lea e numera tasi le latou taumfaiaga, Aisea?
“Auā o lo’o mautū Faiga Fa’avae, lelei Tulafono e limata’ita’iina ai le auala e tatau ona fa’atino ai investment fa’apenei..
“E lē tatau, lē tatau ona fa’atinoa fa’apolokiki le taumafaiga lenei, e tatau ona fa’apine ma fa’agaioi fa’apisinisi.
Ua saunoa le Palemia, o se taimi o i luma ona maua lea o se avanoa ma Sui o le Ofisa o le UTOS latou te talatala manino ai aiaiga ma ta’iala uma o lenei fa’amoemoe.
Faasilasilaga Tāua
- Ta‘utino Lise-Marie sa Pepelo i Leoleo ma Taumafai e Fa‘asesē i le Faagasologa o le Fa‘amasinoga - September 2, 2026
- Police Brutality Alleged after Sinamoga Father Dies Following Drug Raid - August 29, 2026
- Maiava Iulai Toma Remembered for a Lifetime of Service to Samoa - August 26, 2026
