Faa-Samoa

Palemia i le Taitaifono a le Lakapi Samoa: “Aua le Faapolokikia le ‘Au a le Atunuu”

December 14, 2025

820

Tusia: Pesetā Tusiga Taofiga, Sooupu a le Malo. “Ae a pe ā mālilie ia le Komiti Fa’atonu o le Lakapi Samoa, o ‘ese ia ma le Lakapi Samoa, ‘aua le fa’apolokikia fua le ‘au a le atunu’u iā te outou,” o le saunoaga lea a le Palemia Hon Laaulialemalietoa Leuatea Polataivao Fosi Schmidt, i le Ta’ita’ifono ma le Komiti Fa’atonu o le Lakapi Samoa.

O le Komiti Fa’atonu a le Lakapi Samoa e Taitaifono le Sui Faipule le afioga i le Taitai a le Itu Agai Tuilaepa Sailele Malielegaoi. E Peresitene le afioga i le Sui Faipule a Faasaleleaga 2 ia Namulauulu Sami Leota. E auai ai fo’i ma le Sui Faipule a le SUP le afioga ia Faleomavaega Titimaea Tafua faapea lē sā fai ma Sui Faipule o Safata ia Leaana Ronnie Posala.

Ua fa’asa’o e le Ta’ita’i o le Mālō se tusitusiga sesē a le nusipepa o le Samoa Observer, ua tu’uā’ia ai le misia e Samoa o le fesoasoani mai le Lakapi Iuni a Ausetalia e $50 miliona Ausetalia mo le lima tausaga, tusa lea ma le ta’i $10 Miliona tala Samoa i le tausaga, e pei ona fa’amanuiaina ai fo’i Fiti ma Tonga i lea lava fesoasoani.

Saunoa manino le Susuga i le La’aulialemalietoa Leuatea Polāta’ivao Fosi Schmidt, e pepelo ia tu’uā’iga, o le fa’asa’oga o lea tala sesē, o lo’o tālia se tali a Ausetalia i lana talosaga na ‘ave iai, e fa’amanino mai po’o fea tonu e tu ai le Mālō i le fa’asoaina o lea seleni tele.

O le naunauta’iga o le Mālō, ia matuā ifo tonu lenei fa’amanuiaga i le atina’eina o le ta’aloga lakapi i Samoa, e tauala atu i Iuni Lakapi ta’itasi i le atunu’u, o le afuaga lenā e tāua ai le finau atu o le Mālō, ina ia i le Mālō le pule atoatoa mo le faitalia i le fa’asoa tatauina o lea seleni.

O le ‘upu moni, ua le’o toe i ai ni Kamupanī Tetele i le lalolagi o fia ofo mai le fesoasoani e lagolago ai i le atina’eina o le Lakapi Samoa, ae afua i se a?

O le taofi o le Palemia, ona ua nini fa’atasi le polokiki i ‘ai latou o lo’o mau tofi i le Komiti Fa’atonu o le Iuni Lakapi ma le taumafaiga a le atunu’u e atina’e lenei fa’agatama ina ia tumatila ma fa’aleleia atili.

E afua la ona ma’ema’eā le Mālō i le seleni lenei, auā o lea ua māioio le Matāgaluega o Ta’aloga ma Alagā’oa mo le Soifua Fiafia o Tagata fa’apea ai ma le S.A.S.N.O.C. o nei itutino mavae o Ta’aloga, e tatau ona fai mo Sui o le Mālō i le fa’asoasoaina tatau o lea seleni.

O tausaga ta’itasi, e le’o mapu ai le lagolagosua a le Mālō, ma e faitau Miliona ana tupe alu tauala atu i le U.T.O.S. ma le S.I.F.A. e tulei ai le Lakapi Samoa ina ia si’itia lona atina’e.

Peita’i ua fa’ailoa manino i se fonotaga a le silia ma le 30 Iuni Lakapi Fa’aitumālō i Samoa ma le Palemia, na folasia ai atugāluga o nisi o Kalapu Lakapi, i leai o se fa’amanuiaga mai le Lakapi Samoa e o’oo’o atu i Kalapu Lakapi fa’atoā tau atia’e.

Greenology is Samoa’s leading provider of ICT Solutions!

Ta’utino le Palemia i a’i latou nei, na’o le tasi lava le auala e fofō ai lea fa’afitauli, o le mālilie uma e sui le Komiti Fa’atonu atoa a le Lakapi Samoa.

“Se’i silasila i le i’uga o taumafaiga a le Manu Samoa, sa mitamita ai le agaga ma fa’afaigatā i ‘au tetele ona fa’ato’ilaloina i tatou, ae ā nei aso, ua tatou faiā’ina lava i ‘au e lē taulia.

“O le taimi nei, lea ou te fa’atali i se tali manino a Ausetalia, po’o fea e tu ai le Mālō i le fa’asoaina o le seleni lenei, se’iloga ua faimai Ausetalia o le ā i ai le pule atoatoa a le Mālō i le fa’asoaina o le seleni lenei, ona ou saini loa lea.

“Auā e leai se mea fa’apea e saini a’u ma le Mālō, ae leai se pule a le Mālō i le fa’asoaina o lea seleni, ona ‘ave sa’o lea i le Komiti Fa’atonu o le Lakapi Samoa latou te fa’asoaina, ae ā fa’aletonu la lona fa’asoaina, ona ā lea?

“O ai o le ā tu’uā’ia ma toe fa’asaga mai i ai Ausetalia?

“O le mea lea, outou uma o lo’o i le Komiti Fa’atonu a le Lakapi Samoa, fa’amolemole ia, soia le fa’apolokikia le ‘au a le atunu’u, ma o ‘ese ia ma le Komiti Fa’atonu, ae tu’u le ‘au a le atunu’u.”