TATALAINA O LE ULUA’I VAEGA O LE TAUVAGA MO LE SAILIA O SE TAUSALA O SAMOA. SAUNOAGA AUTU Minisita o Tagata Tafafao Maimoa mai Fafo Hon. Fata Ryan Schuster, 5 Nov 2025.
Lau Susuga i le Taitai o le Sauniga, Lau Susuga Amosa Reupena
Minisita o le Kapeneta ma Minisita Lagolago
Mamalu o Malo Fa’aaloalogia
Lau Afioga i le Fa’amasino Taiulu o le tatou tauvaga ma lou auva’a
Lau Afioga I le Tausala o Samoa Tausala o le Pasefika
Le paia o Samoa potopoto, aua tama ma aiga, aiga foi ma a latou tama, le usoga a Tumua a Pule, Ituau ma Alataua, Aiga i le Tai ma le Va’a o Fonoti
Afifio foi Sua ma le Vaifanua, Fofo ma Atiulagi, Ituau ma le Alataua, Saole ma Saleaumua ma le Launiu Saelua, Afio le Laau-na-amotasi, Afifio Faatui, Fetalaiga i To’oto’o, ma upu i le Manu’atele.
Ua fa’amalo le lagi soifua, fa’amalo le folau, o lea ua o tatou laulua fesilafa’i i le alofa o le Atua e ala i le ulua’i vaega o le tatou Tauvaga o le Sailiga o se Tausala o Samoa 2025.
E fia fa’aleo foi le agaga fa’afetai i le susuga i le Taitai o le Sauniga ona o le upu folafola, e tāoso ai le folauga a tamaitai tauva o lenei tausaga.
O le manulauti po o le manatu autu, ua mae’a ona fa’alauiloaina aloa’ia, e ‘au’au i ai le tausinioga mo le sailiga o se Tausala o Samoa 2025, Samoa e Pele Tasi i le Agaga.
O le vavae muitiiti le lamepa e lē ma tineia. O lenei manulauti, o se fa’amanatu tāūa e atagia ai tulaga uma lava e Pele Tasi ai Samoa i le Agaga.
O le tatou fa’asinomaga, ma o le tatou tofi, e tatou te fa’amemelo ma fa’apelepele i ai.
O se fuaitau foi e mafai ona fa’atusatusa i le vavae muitiiti le lamepa e lē ma tineia, e atagia ai foliga va’aia o le taua o le aputiputi, o le puipui ia saogalemū, ma taumafaiga uma ia lē mate le lamepa, po o le a lava le muitiiti o le vavae o le lamepa, e ola pea, aua o aga ia e fa’atino ma fa’aauau pea, aisea?
Aua o Samoa e pele tasi i le agaga. O lona uiga, e fa’atumauina pea, e le matineia, e ola pea i loto ma agaga, aua o lo tatou fa’asinomaga ma o lo tatou tofi fa’asoa mai le lagi.
O le uluai vaega lenei o le tatou tauvaga o le sailiga o se Tausala o Samoa mo lenei tausaga.
O le sailiga o se tausala o Samoa, o se tasi o polokalame a le tatou Mālō, e tapu’e ai agava’a o tamaitai Samoa ina ia mafai ona tula’i mai e avea ma Amapasa poo se ave fu’a fo’i mo Samoa i le atu Pasefika ma le lalolagi atoa.
O le tatou Polokalame la ua fa’ata’oto mo lenei afiafi, e pei ona fa’ata’atia le alāfua e le Faalapotopotoga a le Onomea talu mai le 2023, e tolu lava ni vaega o le a molimauina ma maimoaina e Samoa aoao ma le tatou atunuu atoa e aofia ai – vaega o le sarong poo le la’ei e fa’amālū ai le tausala, o le popo ma le isi vaega lea ua toe fafagu mai i le tausaga lenei, o le tiputa.
Mo le silafia e le atunu’u, e tolu ni vaega poo categories o le Tauvaga lenei ua loa tausaga e lē o toe fa’atinoa. Muamua o le tatou Siva Samoa. Lona Lua o le Popo, ia ma le vaega e tolu o le Tipiuta.
E faaleo ai le faafetai a le tatou Malo i le Faalapotopotoga a le Onomea ona o lo latou sao taua e le gata ua matua’i siitia le tulaga o le fa’atinoga o lenei polokalame tāua a le tatou Malo, ae ua toe fafagu mai nisi o vaega tupito o le tatou Tauvaga, ua loa tausaga e le i toe fa’atinoina.
O le agaga maualuga o le tatou Malo ia le gata e siitia le tulaga o le fa’atinoga, e pei ona fa’ata’oto mai e le Onomea, ae ia fa’aauau pea tulaga lelei uma ua ‘ausia, ā taeao ma le lumanai, aua le atinaeina o tamaitai Samoa, e tauala atu i le tatou Tauvaga o le Sailiga o se Tausala Filifilia poo se Augafaapae Filifilia a Samoa i le lumanai.
Public Notices
- Keith Smith Officially Accredited as Canada’s High Commissioner to Samoa - September 1, 2026
- Diesel and Kerosene Prices Rise in September - September 1, 2026
- BSP Samoa Officially Opens New Branch at Matautu - September 1, 2026
