Molia Laaulialemalietoa i le Le Usitai

0
628

Ofisa Sooupu – Ua faalauiloa faalaua’itele nei e le sa avea muamua ma Fofoga Fetalai faapea ai ma le Minisita o le Kapeneta, Laaulialemalietoa Leuatea Polata’ivao i faasalalauga e faapea na te le’i faamavae ma e le faamavae foi ma le Vaega Faaupufai e Puipuia Aia Tatau a Tagata (HRPP).

Peitai na saunoa le Palemia, Afioga Tuilaepa Dr. Sailele Malielegaoi o ia foi o le Ta’ita’i o lenei Vaega Faaupu fai i luga o le ala ata a le TV1 e faapea; “O le mea lea e ogaoga tele, ae a fai e le faia se iuga faapea e te toe vaaia pea o tula’i mai mea faapea, mo le malosiaga o le HRPP e tupu loa se mea faapea fai le iuga.”

“Mafuaaga na e malosi ai mea nei o vaega faaupufai, e tutū faatasi; finagalo foi lena o le toatele lea e fesoota’i mai a’u, fai se iuga o le uso lea.”

“E le toe fefoifoia’i la le iuga, telế a le avanoa na tuu i ai, lea ua ova ma le tausaga e le’o toe oo atu i ni a matou fonotaga, sa i ai a le agaga foi lea o le fetuutuuna’i.”

Saunoa faaopoo foi Tuilaepa; “Lea la ua talia e le matou vaega, lea sa fono nei le Komiti a le matou vaega, o la foi la ua avatu ma le tusi ma momoli i ai, e faafetai foi ia Laauli i le taimi sa matou galulue ai.”

“Ia ma logo aloai i ai o lana saunoaga lea na fai, o la ua uma ona silafia o lana saunoaga e tetee mai ai i le teuteuga o le Faavae, o lana faamavaega aloaia lena i le matou vaega, ua talia.”

“O la la ua talia lana faamavaega, e leai nisi mea e toe faia o lea e faalogologo uma Samoa, matuã manino a lona te’ete’e mai i le vaega lenei.”

“Ia ma e leai se toe aoga o nisi laasaga o lea ua matuã manino, auã e iai foi matou foi feagaiga e osi, ma aafia ai mea ia, ia lea a la ua uma ua talia a ma le fiafia lana faamavaega mai i le vaega lenei.”

I le tulaga i faiga faavae ma aiaiga a le faafaletui (HRPP) saunoa Tuilaepa e faapea;

“O le taua ia o mea ia o le faatumutumuga o lou loyalty i le vaega o le teuteuga o le Faavae, o ni tulafono ogaoga ma le aoga mo le atunuu mo le lumana’i, o lona uiga o le tagata e tete’e, o ua le talia ia fuafuaga lelei a le vaega, e puupuu a.”

Matou sainia uma a le tulaga lena i le sainia o le matou feagaiga, auã e fai a matou feagaiga osi, talu mai a le mea lea na o ese ai le isi vaega i le 1985, faatulaga mai ai loa le mea lea, e le mafai ona talia oe e te alu e te tauva pe a le muamua saini le mea lea, mea foi na e maopoopo ai ia le vaega lenei o le HRPP.’

“Ma o soo se vaega faaupufai a e le mafai ona maopoopo, latou mea ia e fai pe a i ai se tagata e faatu ‘ala i le mea e taumafai le vaega e fai, mea na lea e mafai ai nei galuega lelei e tele e fai, ona o le tutufaatasi ma fai faalelei ia galuega.

“Aua o ia mea uma e fai nei, ia faapea e fai ia se tulafono mo se matou lelei, e fai mo le lelei o le atunuu, fuafuaga uma e pei foi o lea a e maioio lelei ia le mea foi na fai i le suiga o taavale, ia ae savali tete’e, ia ma le anoano a foi o le tau faifaiga o le a foeti tagata, ia e leai a ni mea faapena.”

O loo faamauina foi i tausaga ua alu e tele nisi o tulaga faapea sa tula’i mai i nisi o Tulafono ma le toe teuteuina o le Faavae, e pei o le tuaoi e vaelua ai le Itumalo o Safata ma isi tulanono, saunoa ai Tuilaepa e faapea;

“O faafitauli ogaoga ia sa faafeagai ma le atunuu ae pei e fefefe le faigamalo na muamua atu i le HRPP fai mai o afi, o le mea mo’i a e ia le tulaga foi lea e palaaai e fai, latou sa ta’ita’ia le Malo e fai, ia ma le mea lea o le fia lelei i le atunuu, ona le faia ai lea o le mea e tatau ona fai.”

“O le mea la lena o lea e taua tele ai i le HRPP o mea ia e masani ona le lotea e isi faiga Malo i luma atu o le HRPP, auã o le fofõ lea o mea ia; pei e fefe e fai ni fofõ ogaoga, ia lea la ua omai le HRPP fai le fofõ ia e tumau mo le agai atu i le lumana’i.”

Saunoa faopoopo Tuilaepa;

“O le taimi foi la sa faataoto mai e o tatou mãtua i le Faavae, manino a lo latou agaga; amata i mea ia ua faatatia e latou auã e manatua o le tulaga foi lele i le tatou tuto’atasi e fou i o tatou mãtua, e fou ia i latou o lea e tau fai autago, auã o nei mea o upu fai o Malo faatemokalasi tatou te le masani ai, ia lea la na tau faata’ita’i ai ia nai toeaiina;”

“A’o lea lava ua latou silafia e i ai le taimi e foi mai ai fanau a le atunuu, a’ooga lelei i fafo ma malamalama i le loloto o mea ia, ia na omai loa lea o latou e faatino; o lea la ua oo i le taimi e tatau ona faatino uma ai mea ia.”

“O le ala foi lena o lea e augofia ai ia a’u ma le vaega faaupufai e faamalamalama auã na o le pau a lea o le a’upega o lea e faoga e le HRPP, o le a’upega e faamalamalama i o tatou tagata, e i ai a la tagata e te fiu e faamalamalama ae le fia malamalama ona e ese ia le agaga la e i ai; pau a le agaga la e i ai o le mana’o e aveese le HRPP.”

“Ua ou te’i i le tu mai o le tusi a le isi fai mai o le aia tatau a le tagata e faatu ai a lona ia nuu, ma fai ai ana ia matai, ou fai atu e le o se aia tatau le mea lena e puipui e le Malo, o le mea tonu lena o lea ua e talanoa mai ia te a’u o le Ta’ita’i o le Vaega e Puipuia Aia Tatau; o aia na tou te faia o aia faa-le-tatau, ma e le lagolagoina e le Malo lenei ni aia faa-le-tatau mo le mea o le fou o nuu ma pulega faamatai.”

“O le atunuu lenei na o le pau a le ituaiga aia e puipuia e le vaega lenei o le aia tatau, ae le puipuia ni aia faaletatau.”

Na faai’u le saunoaga a Tuilaepa e faapea:

“Lea la na e laga mai le tulaga foi la ua exercise le aia a Laauli e alu ese ai i le faaleo mai o lona tete’e, mea lena ua uma ona matou sainia.”

“Pau la le mea mo le mea o le tagata e toa, o le HRPP e toa, faamavae loa ma le Palemene, e alu e toe fai le faigapalota, se’i saili poo fea le mea o tu ai lona itumalo.”