(Aso tofi 17 Mati 2022) I le Faasalalauga faapitoa mai le Afioga i le palemia Fiame Naomi Mata’afa, Ou te faatalofa atu i si o tatou atunuu, ao feagai ai ma malologa o le afiafi, faafetai i le Atua i lona agalelei ia Samoa, ao tatou iai pea i taimi faigata, ma le ma’ale’ale ona o le Koviti 19, o lea faatoa ma’ea ona feiloai le kapeneta i le po nei, ina ua maua mai le faaliga i le Matagaluega o le Soifua maloloina, i le faamaonia ai o le aafia o se tasi, i tua mai o nofoaga faanofoesea i le siama o le koviti 19.
O lenei tagata sa faatino ana suega i le aoauli nei, e tapena ai mo le tuua ai o le atunuu ae peitai sa maua ai ua pisia i le siama. O loo faatino nei e le Matagaluega o le soifua Maloloina tulaga uma e saili ai le mafuaaga o le pisia ai o lenei tagata, atoa ai ma le sailia o i latou uma sa fesootai ma latalata iai, o le galuega tele lenei galuega, peitai e ao ona faatino, ina ia vave ona maua i latou uma ua masalomia ua ‘aafia ma fai ai latou suega ma faatino ai a latou galuega faasoifua maloloina e moomia mo i latou.
E tusa ma le faatulagaina o tatou la’asaga mo le puipuiga o si o tatou atunuu mai le faama’i ua ou faasilasila aloaia atu ai e afua atu i le ta o le 12 o le vaeluaga o le po a nanei o le a see atu le atunuu i le la’asaga 2 lanu moli o lo tatou puipuiga mai le koviti 19 i lalo o le la’asaga 2 o le a toe faamalosia ai le faaali o Pepa tui i soo se nofoaga e agai mai ai, ma le faia o tali fofoga i taimi uma o le a tapunia uma aoga i le atunuu tapunia o fale kalapu, fale ava fale koleni ma taaloga uma e faa’auau ona tatala faleoloa ma isi auaunaga, pei o maketi fale talavai ma pamu penisini i taimi faatulagaina e afua atu i le vaeluaga o le po taeao aso toonai 19 Mati 2022 o le a see atu ai le atunuu atoa i le laasaga 3 lanu mumu seia aulia le vaeluaga le po le aso Lua 22 Mati 2022.
I Lalo o le laasaga 3, o le a tapunia atoa ai le atunuu ma e faapea fo’i aoga, galuega, femalagaiga o vaa ma va’alele i totonu o le atunuu, ma Malaga faale’vaomalo seia vagana ai auaunaga ua faatulaga mo le tuuina atu o auaunaga mo’omia mo le atunuu atoa.
Ao iai le atunuu i suiga o laasaga, o le a galulue le komiti o faalavelave faafuasei, e ta’imua ai le Matagaluega o le Soifua maloloina, e faatino vaega uma mo le moomia ma le sailia o i latou sa iai ni feso’otaiga pe latalata i le ua aafia ma faasolo galuega faasoifua maloloina mo le puipuiga o le atunuu, o le mea lea, le atunuu e, e fautuaina le tapena o mea e mo’omia e o tatou aiga taeao, e faasauni ai mo le tapunia o le atunuu i le vaeluaga o le po a taeao o le faalauteleina o aiaiga o vavao, o le a faailoa atu i faamatalaga e tuuina atu tatou malo.
“Ia Samoa, ia tatou loto tetele pea, ma faamoemoe i le Atua, ona o ia lava e tu ta’imua i aso faigata faapenei, o le tatalo ia mau pea le to’ovae, ma lava papale pea si o tatou atunuu, ao taumafai galuega mo lo tatou puipuiga. Faafetai tele I lo outou fai tatalo, le tapuaiga mau I si o tatou atunuu. Soifua.”
(0)
