Faa-Samoa

Fa’asala e le Fa’amasinoga Maualuga le to’a 26 i le Lē Usita’ia o Poloa’iga a le Fa’amasinoga

July 16, 2026

248

Ua tuuina mai e le Fa’amasinoga Maualuga se lapata’iga malosi mo Samoa, ina ua fa’asalaina le to’a 26 o i latou na lē usita’ia poloa’iga a le Fa’amasinoga e molimau ai i le mataupu fa’a-palota a Falealili 1.

O le taimi muamua lea ua faia ai se fa’ai’uga fa’apenei i Samoa, ma molia ai le to’a 51 o molimau ina ua latou lē usitaia poloaiga a le Faamasinoga.

I lenei fa’ai’uga na tuuina mai e le Fa’amasino Sili, le afioga ia Satiu Simativa Perese ma le alli Fa’amasino, le Susuga ia Leiataualesa Daryl Clarke.

Na la fa’ailoa ai e fa’apea o le fa’alavelaveina o tagi fa’a-palota ma le lē usita’ia o tusi samania a le Fa’amasinoga, e lamatia ai le fa’amaoni o faigapalota ma le fa’avae o le fa’atemokalasi i Samoa.

I se vaega o le faaiuga o loo faapea mai ai le Faamasinoga: “O faigapalota sa’oloto ma le amiotonu o le fa’avae lea o se malo fa’atemokalasi. E tatau ona atagia ai le finagalo moni o tagata palota ma e lē tatau ona aafia i ni faiga pi’opi’o.”

Mai i ē na fa’asalaina, e to’a 18 na fa’asala i le sala tupe e $500 tala, ae to’a 8 na fa’asala i le $200, ma e tatau ona totogi a’o le’i taina le 12pm i le aso 12 Aukuso 2026.

E to’a 23 na sao mai i moliaga, ina ua talia e le Fa’amasinoga sa latou taunu’u atu i le fale fa’amasino i lenā aso, ae na fa’aseseina i fa’amatalaga e fa’apea ua ave i tua le mataupu ua maea ona soalaupuleina.

E to’atasi e le’i mafai ona tu’uina atu iai le samania ma sa lē auai atu, ae o le isi ua maliu.

Na fa’ailoa e le Fa’amasinoga e na’o sala tupe o le a tu’uina atu i lenei taimi. O le sala e $500 na fa’atatau ia i latou na iloa e le Fa’amasinoga sa tu’uina atu ni molimau lē moni pe taufa’asese, ma sa fuafua lava ma le mautinoa, e lē auai atu.

O le sala e $200 na fa’atatau ia i latou na talitonu le Fa’amasinoga e moni a latou molimau, peita’i sa latou solia lava le poloa’iga a le tusi samania, e auai atu ai i le Fa’amasinoga.

Na fa’aalia fo’i e Fa’amasino lo la popolega i le tele o ‘alofaga na tu’uina atu e molimau.

Sa iai nisi na fa’apea atu ua “galo” le aso o le Faamasinoga, ae o nisi na fa’apea atu, sa faitau i luga o le Facebook i se tala, ua uma ona soalaupule le mataupu, ma toe fo’i ai loa i lo latou fale.

Na ta’ua e le Fa’amasinoga e lē talitonuina le tele o ia fa’amatalaga ma sa foliga mai na saunia muamua ae le’i o atu i le faamasinoga.

Na fa’ailoa fo’i e le Fa’amasinoga e iai tu’uaiga e ono aofia ai le solitulafono o le criminal contempt e fa’atatau ia Tuiloma Sagaga Failala Pu’a, Seufaleupolu Apelila, ma le sa avea ma Sui Palemia, Hon Toelupe Poumulinuku Onesemo, ma latou fautuaina ai le tatau ona iai se isi su’esu’ega.

Peita’i, na fa’amamafa e le Fa’amasinoga e le’i maua e i latou nei se avanoa e tali atu ai i tu’uaiga na faia e le tele o molimau, e fa’asaga ia i latou, e faapea sa latou taofia i latou, e aua le oo atu fua i le Faamasinoga.

Na fa’amamafa e le Fa’amasinoga Maualuga, e tatau ona usita’ia poloa’iga a le Fa’amasinoga i taimi uma.

O so’o se taumafaiga e fa’alavelave i molimau po’o le fa’atuai-ina o tagi fa’a-palota, o le a manatu mamafa iai le Fa’amasinoga ona e lamatia ai le fa’atuatuaga o tagata i faigapalota ae maise o le fa’amasinoga.

O i latou nei sa molia: