Faa-Samoa

Fa‘amalolo Tumau Leoleo Falepuipui e To‘alua ma le Tagata Faigaluega Savili e Toatasi ua Faamaonia le Fa‘aaogāina o Fualaau Fa‘asāina

September 8, 2026

1282

8 Setema 2026, Apia Samoa. Ua fa‘amalolo tumau ni leoleo falepuipui se to‘alua ma se tagata faigaluega savili (civilian) e to‘atasi a le Matagaluega o Leoleo, Falepuipui ma Toefuata‘iga, ina ua fa‘amaonia i suesuega fa‘aaogāina o le mariuana ma le aisa.

Na fa‘amaonia e le Sui Komesina o Leoleo, Leiataua Samuelu Afamasaga, o i latou nei e to‘atolu sa fa‘amalolo lē tumau mai galuega i le masina o Aukuso, a o fa‘agasolo su‘esu‘ega a le Matagaluega.

“E toatolu latou na aafia i totonu o le matagaluega, tasi le savili o le maintenance officer, ae lua correction officers,” o le saunoaga lea a Leiataua.

“O le toatolu uma lena, lea ua faamalolo ma terminate uma, ma ua lua nei vaiaso talu ona faamalolo tumau.”

O leoleo falepuipui e to‘alua, o ni tagata faigaluega ua mae‘a ona fa‘atautoina, ma e fa‘alua ona maua i su‘ega (drug testing) le fa‘aaogāina o le mariuana.

Ae mo le tagata faigaluega i galuega tau tausiga ma le fa‘aleleia o meatotino a le Matagaluega, sa fa‘amaonia i ana su‘ega le mariuana fa‘apea le methamphetamine poo le aisa.

E Le‘i Moliaina i ni Solitulafono

Ina ua fesiligia pe o le a molia i latou nei i ni moliaga fa‘asolitulafono, na saunoa Leiataua, e le‘i molia i latou i lalo o tulafono tau solitulafono, ae sa fa‘atino fa‘asalaga i lalo o faiga fa‘avae ma aiaiga tau amio pulea a le Matagaluega e ala i le Professional Standards Unit (PSU).

Na fa‘ailoa e le Sui Komesina, o lo‘o iai vaega o le tulafono e mana‘omia ona tapena lelei. “E le o molia criminally ona e iai vaega o le tulafono e tatau ona tapena lelei, ae o loo molia i lalo o faiga faavae a le Matagaluega, ae maise o aiaiga o galuega faatonutonu ina ia aua nei tagofia fualaau faasaina.”

I le taimi nei, o le a fa‘aauau pea ona fa‘amalosia e le Matagaluega ana faiga fa‘avae i totonu, ina ia puipuia le fa‘amaoni ma le mamalu o le galuega fa‘aleoleo, ma ia matua fa‘asāina ai le fa‘aaogāina o fualaau fa‘asāina e ana tagata faigaluega.

Faiga Fa‘avae mo Su‘ega o Fualaau Fa‘asāina

O Mati o le tausaga nei, na fa‘alauiloa aloa‘ia ai e le Matagaluega o Leoleo, Falepuipui ma Toefuata‘iga Faiga Faavae, Drug Testing Policy and Procedure, e fa‘amalosia ai le fa‘amaoni ma le tali atu o tagata faigaluega, aemaise mo le Matagaluega o Leoleo ma Falepuipui lea ua tu‘uina atu iai le tiute o le puipuia o le saogalemu o tagata lautele.

Na fa‘ailoa e le Matagaluega i le taimi na fa‘alauiloa ai lea faiga fa‘avae, e leai se avanoa mo le fa‘aaogāina o fualaau fa‘asāina i totonu o se auaunaga ua tu‘uina atu i ai le fa‘atuatuaga e puipuia le atunuu.

Ua Fa‘asāina fo‘i e le Tulafono le Fa‘aaogāina o Fualaau Fa‘asāina

O le Narcotics Act 1967 a Samoa ua uma ona aiaia ai le fa‘asāina o le fa‘aaogāina o fualaau fa‘asāina.

I lalo o le Vaega 7 o lea Tulafono, e lē gata e fa‘asāina ai le umia o se narcotic poo se fualaau fa‘asāina, ae ua fa‘asāina fo‘i le taumafaina, ulaula, poo so‘o se isi lava auala e fa‘aaogāina ai se narcotic ma le iloa lelei.

Avanoa Faigaluega