O le taeao nei, Aso Toanai 15 Novema lea ua sauni atu ai lau Faletupe o Tagatanuu o Samoa le NBS, e tuuina atu penisione ma penifiti mo le mamalu o le atunuu ma aloa’ia ai loa le siitaga e pei ona folafolaina e le vaega faaupufai o le Faatuatua i Le Atua Samoa ua Tasi I le latou Anavatau.
E pei ona faasalalauina e le NBS, o le taeao nei e mafai ai ona tala penisione ma penifiti mai le lala autu i Apia, faapea fo’i le malae vaalele i Fagalii ae maise o le lalā i Salelologa Savaii.
O le siitaga o le penisione sa $200 i le masina ae o lea ua $300 i le masina mo i latou uma e 65 tausaga.
Ae o le siitaga mo le mamalu o le atunuu e iai aafiaga tumau o le soifuaga sa $100 tala i le masina ae o lea ua $300 i le masina.
O nei siitaga e tusa ai ma le pasiaina aloaia o le Tala o le Tupe 2025/26 ua tuuina mai e le Kapeneta e amata atu i le masina nei o Novema.
E momoli le faafetai i sui au faigaluega a le Malo i le Matagaluega o Tupe (Ministry of Finance) faapea le vaega o le NPF e latou te gafa ma le faamautuina atu o le penisione ma penifiti (Samoa National Provident Fund) ae maise o le auauanaga a le Faletupe o Tagatanuu o Samoa mo lālā e tolu ua avanoa nei i le Aso Toanai mo le tuuina atu i le mamalu o le atunuu ae le’i oo atu i le Sapati a taeao.
Afifio mai loa e tala le penisione ma le penifiti (disability fund) i le taeao nei.
Public Notices
