E toa 34 le aofai o tagata faaopoopo o loo taofia e leoleo ma molia i le uumia o fualaau faasaina e pei ona faailoa mai e le Sui Komesina o Leoleo ia Leiataua Samuelu Afamasaga i se feiloaiaga ma le vasega o tusitala sa faia i le taeao o le Aso Toanai 10 Ianuari 2026.
Mai lea 34 – e to’a 27 alii ae to’a 7 tamaitai.. e faaopoopo atu i le 54 lea sa faasalalau muamua. E 15 tausaga lē e pito laititi, ae 50 tausaga o lē e pito matua.
Saunoa Leiataua, mai le Aso 24 o Tesema 2025 seia oo mai i le Aso 6 o Ianuari 2026, e 9 osofaiga sa faatino i totonu o Upolu.
“I nei osofaiga e iva, e toʻa luasefulu lua (22) i latou na molia – e toʻa fa (4) tamaitai ae toʻa sefulu valu (18) alii.
O nuu sa aafia i nei osofaiga, po o nuu o loo iai piitaga a i latou na molia, e aofia ai:
Lepea,
Siumu,
Alafua,
Vaitele Tai,
Tulaele,
Fasitoo-uta,
Nofoalii,
Satupaitea,
Faleatiu,
Moataa,
Mulivai Safata,
Fualuga i Savaii,
Taufusi i Apia,
Malololelei i Afiamalu,
Vaipuna,
Leone,
Leauvaa,
Saina i Faleata,
Vaitoloa.
I galuega sa faatino i Savai‘i i le Aso Faraile 9 Ianuari, e tolu osofaʻiga na faatino e leoleo, e aofia ai Maota, Salelologa ma Fa‘ala, Palauli.
“E to‘a 12 i latou na molia i lea aso, e to‘atolu tamaitai ae to‘aiva ali‘i..
“O tausaga o i latou nei e amata mai i le 15 tausaga se‘ia o‘o atu i le 50 tausaga. Sa faatalanoaina i latou uma na molia, ma maua ai faamatalaga i nofoaga o loo nonofo ai.”
“O nisi e afua mai i Maota, o isi mai Vaitele-uta, Papaloloa i Salelologa, Sapulu, Vaiusu, Vaimoso, Letogo, Nu‘u, ma Fa‘ala i Palauli.”
“O mea sa maua mai i nei osofaʻiga e tolu i Savai‘i, e aofia ai laau fou o fualaau faasāina, nisi vaega o le aisa, paipa e ula ai le aisa, faapea ma faga.”
Na saunoa le Komesina e momoli le agaga faafetai i afioaga sa lagolagoina le galuega a leoleo, aemaise foi i fesootaiga ma le Malo e ala i galuega faatino i lalo o tulafono o loo limataitaia ai galuega.
“E tasi lava le agaga o leoleo, ina ia aua ne‘i aafia o tatou aiga ma fanau i le lumana‘i. E le gata i aafiaga o fualaau faasāina, ae ona e ua mafua ai foi le tele o isi solitulafono ogaoga.”
Sa faaaogā foi e le Komesina o Leoleo le avanoa e faaauau ai le talosaga atu i le atunuu, ina ia tumau pea le lagolago ma le talitonuina o le Matagaluega.
“Ua sauni le Matagaluega i soo se taimi e faatino ai galuega, ma o le faamuamua foi lea o loo iai i le taimi nei, ina ia oo atu se fesoasoani i alo ma fanau a’o tulata mai taimi e toe tatala ai aoga”.
“E tatala pea le Ofisa o Leoleo i soo se taimi, aemaise o Ofisa (Police Posts) o loo lata ane i afioaga.”
Sa faapitoa se faafetai a le Matagaluega i Pulega o Nuu, o Alii ma Faipule o afioaga, ma talosagaina le faaauau pea o le latou lagolago, aemaise i lenei folauga o le tausaga.
Saunoa Leiataua, o lea ua oo galuega a leoleo i Savai‘i, ae e le gata ai galuega a leoleo ona “O le vaiaso fou, o le a toe molimauina ai nisi galuega faatino.”
“O le faafetai faai‘u, e momoli atu i lo‘u nei faatauvaa, e fai ma Sui o le Matagaluega, i le Afioga i le Minisita, faapea le Afioga i le Palemia, ma Matagaluega uma e aofia ai Leoleo, Falepuipui ma isi Matagaluega lagolago a le Malo.
“Faafetai lava i le lagolago ma le nofo tatalo. E le faigofie lenei galuega, auā e fefiloi faatasi ma le tiapolo..”
“O lea e ao ai ona tuufaatasia a matou tatalo ma a outou tatalo, ina ia manuia ai lo tatou atunuu.”
I se tulaga tau Faamasinoga, o le 90% o i latou ua molia, o loo taofia. O loo sauni o latou Faamasinoga mo Fepuari pe a toe tatala le Ofisa o Faamasinoga.
Saunoa foi le Sui Komesina ia Leiataua, o loo iai se Vaega Suesue Faapitoa (Special Prosecutions Team) o loo tilotilo totoa ina ia mautinoa e manuia le fa’agasologa o Mataupu tau Faamasinoga mo e o loo molia mai osofaiga ia sa fa’atino.
Sa faafetai foi le Sui Komesina i le au faasalalau i le taliaina o le valaau a le Matagaluega ina ia mautinoa ia maua uma e tagata le feau tāua, e le toe solomuli le galuega a Leoleo.
Delicious Cakes & Nana Bellas are Hiring
- Poumau Tiufea Vaa, Miss Sili Ecofarm is your Miss Samoa 2026 - September 6, 2026
- Little Rina Wins Inaugural Measina Festival Fautasi Race - September 3, 2026
- Miss Taumeasina Island Resort Inspired by Her Grandparents - September 2, 2026
