Faa-Samoa

Faaaogaina se Ata Tuai e Ta’uleagaina ai le Auaunaga a le Falema’i i Motootua

August 13, 2026

499

Apia, Samoa 12 Aukuso 2026 Ua tuuina mai se pepa o fa’amatalaga mai le Matagaluega o le Soifua Maloloina a Samoa, e faatatau i tusitusiga a le nusipepa o le Samoa Observer i le Aso Faraile 7 Aukuso 2026.

I lena faasalalauga, o lo’o tuuina mai ai se ata o loo fa’aaogaina ai se fasila’au e faatautau ai le IV i se potu o lo o fa’atinoina ai auaunaga mo gasegase tigaina (Emergency Department).

Ua tuuina mai e le Matagaluega, o lena ata sa pueina i nai tausaga atu i tua, ma e le o se tulaga lea o loo iai lena potu o le ED i le taimi nei.

“Ua ave seseina e le mamalu o le atunu’u le ata e pei ona fa’ailoaina i nei tusitusiga, ma ua a’afia ai taumafaiga a le Matagaluega o le Soifua Maloloina e fa’aleleia ana auaunaga mo le manuia o ona tagata.”

“Mo le silafia e le mamalu o le atunu’u, o le ata pei ona fa‘aalia i tusitusiga, e le o le va’aiga lea o lo o iai le Vaega o lo o Fa’atinoina ai Auaunaga mo Gasegase Tigaina (Emergency Department).”

Ua faapea mai le Matagaluega, ua mae’a ona asia, ma ua fa’amaonia mai e le aufaigaluega o lo o galulue i lea nofoaga o le falema’i, e le o le tulaga lena o loo iai lea potu o le ED i le taimi nei.

O le ata sa faaaogaina e le nusipepa, o se ata ua leva, i se tasi o potu pito i tua o le ED, o lo’o fa’aaogaina e le aufaigaluega e faatinoina ai fusiga o gasegase.

O se pine faamau e pei ona tā’ua, ona o lanu o pupuni o lo o fa’aalia i le ata, e lē o le va’aiga lena o lo o iai i lea potu o le falema’i i le taimi nei.

“O le faaaogaina o la’au e fa’atautau ai IV i le ata e pei ona fa‘ailoaina, o le vaitaimi tonu lea o le pepesi fa’alaua’itele ai o le misela, ma sa fa’aaogaina ia metotia i lena vaitaimi, ona o le to’atele o i latou na a’afia ma taofia i le falema’i, ae utiuti ia mea faigaluega.”

“Ao lenei taimi, o lea ua fa’aaogaina e le tatou falema’i fa’atautau IV u’amea i so’o se nofoaga o le falema’i.”

Ua tuuina mai e le Matagaluega e faapea, “E le o muta le galuega lagolago a lo tatou malo fa’apea pa’aga fesoasoani, e galulue fa’atasi ma le Matagaluega o le Soifua Maloloina.”

“O lo’o galulue pea i taumafaiga e fa’aleleia ai le falema’i ma fa’aleleia mea faigaluega ma masini fa’aaogaina mo le fa’atinoga o auaunaga ma togafitiga mo gasegase, fa’apea le okaina o vaila’au ma fuala’au mo le mamalu o le atunu’u.”

“O le tatalo a le Matagaluega, a tatou maua le loto e tasi ma felagolagoma’i, o le a fa’afaigofie ona fa’atino la matou pitola’au aua lava le soifua maloloina ma le manuia o lo outou mamalu.”