Tusia: Pesetā Tusiga Taofiga. Ua fa’amaonia e le Kapeneta le fa’amatu’uina atu o fesoasoani tau nonōgātupe e māmā tului tauala mai i le Faletupe o Atina’e a Samoa [D.B.S.], mo le atina’eina o pisinisi lāiti ma feololo e auina atu oloa i atunu’u i fafo fa’atasi ai ma pisinisi gaosi oloa, fa’ato’aga ma atina’e tau turisi.
E lua vaega o lea fesoasoani ua aiaia fa’aletulafono tauala mai i le D.B.S. e aofia ai le $3 Miliona mo nonōgātupe māmā tului auā pisinisi lāiti ma feololo mo oloa auina atu i atunu’u i fafo, fa’atasi ai ma le $10 Miliona mo nonōgātupe a pisinisi gaosi oloa, fa’ato’aga ma atina’e tau turisi i le atunu’u.
MO LE $3 MILIONA:
E mafai ona o’o i le va o le $20,000 i le $100,000 le talosaga a so’o se pisinisi lāiti ma feololo e agava’a i lea nonōgātupe.
E 5% le tului i le tausaga, peita’i afai o lau nonōgātupe e $20,000 aga’i le $45,000, o lona uiga e 10 tausaga e totogi ai e aofia ai ma le 1 tausaga e tu’usaunoa ai le tului.
Afai ei le va o le $45,000 i le $95,000 lau nonōgātupe, o lona uiga e 20 tausaga e totogi ai e aofia ai ma le 2 tausaga e tu’usaunoa ai le tului.
Ae afai e $95,000 i le $100,000 lau nonōgātupe, o le ā i le 30 tausaga e togitogi ai e aofia ai ma le 3 tausaga e tu’usaunoa ai le tului.
E lē mafai e tusa ma aiaiga o lea fesoasoani tau nonōgātupe, ona totogi pe fa’atupe e lenei nonōgātupe sau aitalafu tuai [refinancing].
E mafai ona fa’amaonia [guarantee] e se tagata faigaluega se nonōgātupe ei lalo ifo o le $40,000 po’o le fanua fo’i e fa’amauina ai.
MO LE $10 MILIONA:
E agava’a ai pisinisi gaosi oloa, fa’ato’aga ma atina’e tau turisi, ma ei le va o le $100,000 i le $200,000 se nonōgātupe e mafai ona fa’amaonia.

E 3% le tului i le tausaga, ma e 30 tausaga e togitogi ai e aofia ai ma le 3 tausaga e tu’usaunoa ai le totogiina o sea nonōgātupe.
O aiaiga mo lea nonōgātupe, e mafai ona fa’amauina [guarantee] i fanua ma ‘ele’ele.
E lē fa’atagaina fo’i ona fa’aāoga lea seleni e totogi ai ai nisi aitalafu tu’ua o i nisi Faletupe i le atunu’u.

Afai ae manuia so’o se talosaga i vaegātupe ua fa’amatu’uina atu e aofia ai le $3 Miliona ma le $10 Miliona, ona fa’amatu’u atoa atu lea o le 100% o se nonōgātupe mo lē ua talosaga i le taimi e tasi.
O le naunauta’iga o le Mālō, e pei ona fa’ailoa e le afioga i le Palemia, Susuga i le La’aulialemalietoa Leuatea Polāta’ivao Fosi Schmidt, o le fesoasoani lea mo le atunu’u lautele i le tulaga tau atina’e.

O le aotelega o nei nonōgātupe i ona vaega e lua ua vaevaeina ai, o le ā maua sona atoaga pe afai e te susū sa’o i le Ofisa o le Faletupe o Atina’e a Samoa, e fa’atalanoa ai lau matā’upu.
[FA’AMATALAGA O LE ATA: Ofisa Sili o Pulega o Faletupe o Atina’e a Samoa, Afioga iā Muā’autau Raiē Silipa].

Ata Pu’eina: Pesetā Tusiga Taofiga
Important Notice: Opening Hours





- “E leai sa’u tala fa’apenā na faia” Minisita o Soifua Maloloina - November 5, 2026
- 76-0 ua Fa’ato’ilalo ai e Fetu Samoa le au Lakapi Liki a Uelese - October 24, 2026
- Faatauto Minisita Lagolago: Nonu William ma Seumafaleupolu Aperila - October 21, 2026














