Ua faasalaina e le Faamasinoga Maualuga lē sa avea ma leoleo, Mautofu Aiono, poo Tony Aiono, mo le 10 masina i le falepuipui, ona o le ave taavale faatamala na mafua ai le maliu o lona uncle e 67 tausaga le matua.
O le faalavelave na tulai mai i Fasitoouta i le aso 25 Fepuari 2026, a o avea pea Aiono ma leoleo.
E tusa ai ma faamaumauga a le Faamasinoga, sa ave e Aiono se Toyota Hilux, ae sa tietie lona uncle i le pito i tua o le taavale faatasi ai ma kalone vai ma meafaigaluega mo le maumaga.
E leai se faitotoa pito i tua (tailgate) o le taavale.
A o agai atu le taavale i uta i auala galue o Fasitoouta, na lē mafai e Aiono ona taofiofi lelei le taavale a o afe i se pioga.
O le taimi lea na pa’ū ese ai le tamā ua maliu mai le pito i tua o le Hilux ma palasi o ia i luga o le auala. Na matuia manu’aga na aafia ai lona ulu ma lona tino, se’i tulou.
Na faaalia foi i suesuega a Leoleo, e leai se laisene ave taavale a Aiono i le taimi na tulai mai ai le faalavelave.
E lei lesitalaina foi le taavale ma e le’i pasia foi e faaaogā ai i luga o auala lautele. Na maua foi i se suesuega o le taavale ina ua mae’a le faalavelave, e lē saogalemu mo le feavea’iina o tagata.
I le tuuina atu o le faasalaga, na teena ai e le Afioga i le Faamasino ia Leiataualesa Daryl Clarke le finauga a loia a Aiono e faapea, o le faalavelave na mafua mai ona o sina taimi puupuu lava o le lē mataala, poo se faaiuga sese na faia i lea taimi.
Na saunoa Leiataualesa, ua tele tausaga sa tautua ai Aiono o se leoleo ma sa ia silafia lelei e leai sona laisene aloaia e ave ai se taavale.
“That circumstance alone should have prevented you from driving,” o le saunoaga lea a le Faamasino.
Na ta’ua foi e le Faamasino, sa iai muamua se laisene a Aiono, ae na ia faamaonia i le Faamasinoga e lei toe faafouina.
“In either case, you knew that you were not legally licensed to drive.”
O le faaiuga a le Faamasinoga, ua faamaonia le moliaga o Aiono i le ave taavale faatamala ua mafua ai le maliu o se tagata, ma faasalaina ai loa i le 10 masina i le falepuipui.
Ua faasa foi o ia mo le tausaga e tasi mai le uumia poo le toe talosaga mo se laisene ave taavale.
Sa feagai foi Aiono ma moliaga o le aveina o se taavale e leai se laisene, ave taavale e aunoa ma se laisene ave taavale, faatagaina o se tagata e tietie i se tulaga lamatia, faapea le faaaogāina o se taavale e lē saogalemu.
Peitai, na saunoa le Faamasino, o tulaga na faavae ai ia moliaga ua uma ona aofia ma silasila iai le Faamasinoga, o ni vaega e faamamafa ai le matuia o le moliaga autu o le ave taavale faatamala ua mafua ai le maliu.
- Tālia se Ta’otoga Fa’apitoa i le Tino Maliu o Maddy, e Faamautinoa ai le Mafuaaga o lona Maliu - September 9, 2026
- Fa‘amalolo Tumau Leoleo Falepuipui e To‘alua ma le Tagata Faigaluega Savili e Toatasi ua Faamaonia le Fa‘aaogāina o Fualaau Fa‘asāina - September 8, 2026
- Two Prison Officers and Civilian Employee Fired Over Positive Drug Tests - September 8, 2026
