E 8 tausaga le faasalaga i le toese i Tanumalala ua tuuina mai nei e le Faamasinoga Maualuga mo se tamā mai Nofoalii ina ua faamaoniaina lona taumafai e faaoo le oti i se isi (attempted murder).
O lenei faasalaga sa tuuina mai e le alii faamasino ia Fepuleai Ameperosa Roma mo le moliaga e tasi o le taumafai e fa’ao’o le oti i se tagata, ma le isi moliaga o le umiaina o se aupega mata’utia (armed with a dangerous weapon).
O Soo Pasila, sa vevesi ma Faaui Tanielu, o se tama e maupaolo atu i Nofoalii.
E faapea le faamatalaga a leoleo i tolaulauga o le mataupu, na tasogiina (se’i tulou) e Pasila le ua aafia, ma mafua ai ni manuaga matuia tele.
O lē sa aafia e tusa ma le 50 tausaga lona soifia, ma e uso lelei lava le toalua o lē sa aafia, ma le toalua o Pasila.
E faapea o vesiga i le va o le ‘auso lenei na mafua ai ona faaoolima Pasila i lona brother-in-law.
E faapea na uma vevesiga i le va o auso nei, ae ua ita tele lava Pasila i lē ua aafia, ma alu ai loa i le ma’umaga i le vaega o lo’o galue ai lea tamā, ma ia tasogiina i se aga’ese (se’i tulou), ma mafua ai ona motu ese lona ogalima taumatau, ma isi manu’aga loloto i lona papatua.
O lenei fa’alavelave na tula’i mai i le aso 13 o Ianuari o le tausaga nei, ae sa faataunuiina le faamasinoga ia Aukuso ina ua tetee Pasila i ana moliaga.
I le fofogaina o le i’uga e le afioga ia Fepuleai na ia saunoa ai, o itu e ogaoga ai lenei mata’upu, e le gata ina leai se agasala a le alii na a’afia i le alii lea na molia, ae o lea na ia fa’atinoina lava nei gaioiga ona o fe’ese’esea’iga i le va o la ta’ito’alua.
E le gata i lea o le fa’aauau pea ona tasogi lē sa a’afia, e ui na tipiesea lona lima taumatau, ae na fa’aauau pea ona tasogi.
O le fua amata a le itu a leoleo na tu’uina atu i le Fa’amasinoga e 13 tausaga i le to’ese, peita’i, na faia se fua amata a le afioga ia Fepuleai i le 10 tausaga, ona e fua i isi foi mata’upu fa’apenei, na molia ma fa’afalepuipuiina ai foi nisi o tagata i tausaga ua te’a.
Na to’esea e le afioga i le Faamasino le 12 masina mai lenei fa’asalaga ona o le itu ua fa’aalia le salamo moni o le alii o Pasila e ala i lana talosaga na tu’uina atu i le Fa’amasinoga mo se fa’amama avega mo ia.
O le isi 18 masina na to’esea mai i lenei fa’asalaga ona ua mae’a ona faia sana sala i le afio’aga i Nofoalii e 50 pusa ‘apa ma le $2,000 tala ua mae’a ona totogiina i le afio’aga.
Ae sa toe fa’aopoopo e Fepuleai le isi 6 masina i le fa’asalaga lenei, ona o lo’o fa’amauina e iai foi nisi moliaga e tai tutusa lava ma moliaga fa’apenei i le 2016 na fa’amaonia ai foi ma fa’asalaina ai e le fa’amasinoga Pasila.
Na totoe mai ai le 8 tausaga e tuli e lea alii i le to’ese i Tanumalala, atoa ai ma le 2 masina o le moliaga o le umia o se aupega mata’utia lea o lo’o tuli fa’atasi lava i totonu o le 8 tausaga lenei.
