Ua faamaonia e le faamasinoga e pei ona tuuina mai e le alii faamasino ia Leiataualesa Daryl Carke, moliaga e lua o le alii o Tafuna Tauialo i lona umiaina ai lea o fualaau faasaina o le aisa poo le methamphetamine, atoa ai ma lona faaulufaleina mai lea o lea fualaau faasaina i le atunuu.
O le aso 23 o Aperila 2018 i le malae vaalele faavaomalo i Faleolo na taunuu mai ai Tafuna ma lona atalii i le malaga a le vaalele o le Fiji Airways, ma mauaina ai ia te ia le fualaau faasaina o le aisa, e tusa lona mamafa ma le 26.6 kalama.
Na valaauina molimau e 16 a le itu a leoleo i le mataupu lenei, e lagolago ai la latou finauga.
Sa filifili le alii o Tafuna e le faia sana faamatalaga e tusa ai o le mataupu, peitai e toalua molimau sa valaau e tulai mai lana itu e fai ma ona sui.
Sa tulai le itu a lea alii ma faapea e vaivai le suesuega a leleo ma e iai foi ni sese i a latou suesuega. O loo faapea mai le itu a Tafuna e lei maua i le alii o Tafuna ni fualaau faasaina ma na te lei aumaia foi i totonu o le atunuu. Sa faapea foi e  lei mafai e le itu a leoleo ona faamaonia moliaga nei e faasaga atu ia Tafuna.
Sa talia e le Faamasinoga o le ato lanu uliuli lea na maua ai i totonu le fualaau faasaina, ma e lē o teena e le ua molia e tauala atu i lana loia o loo tulai mo ia.
Ua talia e le faamasinoga na aumai i luga o le Fiji Airways lea fualaau faasaina i le aso 23 o Aperila 2018.
O le fesili sa tulai mai i le Faamasinoga, pe na iai i lē o loo molia ia fualaau faasaina?
O mafuaaga na taua e le alii faamasino e ala i lana faaiuga tusitusia, ua faamaonia e le itu a leoleo e aunoa ma se masalosaloga tatau elemeni o le moliaga lenei – o le iai lea i le ua molia nei o le aisa poo fualaau faasaina.
O le taliaina e le faaiuga a le alii faamasino le mau a le alii o le K9 Unit ia Hugo Tauauve’a lea sa ia faapea mai ai, “Na taliaina ma ioeina e le ua molia nei le ato lanu uliuli lea sa maua ai le fualaau faasaina, ma sa faapea mai o ia e onaina.”
Na taua e le faamasino o le taimi foi na suesueina ai pe na kolosi ai Hugo Tauave’a, e lei iai lava se tulaga sa maluelue ai Hugo ae sa manino lava lana mau, e oo lava foi i le faasologa o mea sa tutupu i lea aso i Faleolo.
E pei la o le taimi muamua na ulufale ai Tafuna Tauialo i le malae vaalele i Faleolo a’o lei tagofia a la ato sa omai ma laua i luga o le vaalele, na vaaia le suia o uiga o le taifau sosogi a le K9 Unit ia “Inspector Flynn” ma agai i le o loo molia nei ma lona atalii.
Na maea lea ona agai lea e faatali ato lea o loo faataavale mai ma na vaaia le agai o le taifau i le ato lea sa pikiina e Tauialo.
Sa faaalia foi ina ua agai ane i le vaega o le tiute mo le suesueina ma fesiligia e le tiute po o ia e onaina le ato lanu uliuli lea. Na tali mai Tafuna Tauialo e moni o ia e ona le ato lea faatasi ai ma se chilli bin.
Sa fesiligia foi e Hugo pe o se laau suisui fou lea o loo i totonu o le ato lanu uliuli lea, ae tali mai ioe, o le laau fou ma o iina na mautinoa ai o loo silafia lelei e le o loo molia mea totino sa i tototnu o le ato.
O le taimi atoa sa fesiligia ai Tauialo e lei faapea mai lava e le o ia e onaina le ato.
Sa faapea mai foi le alii faamasino o le taimi lea sa faapea atu ai Tauave’a o le a sueina le ato lea ona o loo masalomia – sa tatau ona faafiti mai ai e le’o ia e onaina le ato, peitai e leai se tala faapea sa faia, sa ia tautino mai lava o ia e ana le ato lea.
O le moliaga muamua o le umiaina o le fualaau faasaina ua le tusa ai lea ma le vaega 7 Â (1)(a) ma le vaega 18 Â (a) o le Tulafono o Fualaau Faasaina 1967.
O le moliaga lona lua o le auamaia lea i totonu o le malo tutoatasi o Samoa o le fualaau faasaina lenei e fuaina lona mamafa 26.6 kalama e aunoa ma se laisene e tatalaina ai pe faataga ai e le ofisa sili o pulega o le matagaluega o le soifua maloloina e pei ona iai le vaega 10 (2)(3) ae le gata i lea o le 17 (1a) o le tulafono lava lea o laau faasaina.
Lona tolu o moliaga na molia mai ai lea alii o lona aumaia lea o se laau faasaina e leo faatagaina i totonu o le malo o Samoa tusa ai ma le vaega 249(a) o le tulafono a le ofisa o Tiute (Customs).
O le vaai a le faamasinoga o se faasalaga faafalepuipui e tatau ona tuuina atu ma ua poloaina le nofo taofia ai o le ua molia, seia aulia le Aso Lulu 20 o Novema mo le toalualuina o le faaiuga a le faamasinoga ia te ia.
