Pine Auro Vaipava Nevo Ioane i le Taamilosaga Siisii U’amea Mamafa o loo faia nei i Initia

0
686

Ua maua le uluai pine auro a Samoa i le taaloga siisii uamea mamafa o loo faagasolo nei i Initia.

O le susuga ia Vaipava Nevo Ioane ua faamanuiaina i le aupaga 67kg sa tauva ai i le vaveao o le Aso Faraile.

“O le lagona fiafia ma le faagaeetia ona o le taumafaiga a lea foi alo o le atunuu, ma o se amataga lelei foi lea mo le au atoa, e faamalosiau ai i le isi foi vaega lea e faamoemoe e tauva i le taimi foi lava lenei taeao..”

“O le tatalo ia mau mai pea lau tapuaiga ma manatua mai le faamoemoe i tou talosaga, ao alo faiva fanau mo faa’agatama tetele o loo feagai ai nei.”

Na faafetaia foi e Tuaopepe le tapuaiga a le atunuu ao toesea ai fanau mo atunuu mamao.

O le susuga ia Vaipava Nevo Ioane ua 35 nei tausaga o lona soifua.

E le fou ia te ia lenei taaloga. Sa manumalo o ia i le pine siliva mo Samoa i Ta’aloga a le Commonwealth i Birmingham mo le aupaga o ali’i 67kg i le tausaga 2022.

Mo Ta’aloga a le Pasefika na manumalo ai le susuga ia Vaipava Nevo Ioane i pine auro e 3 i le Snatch, Clean & Jerk faapea ai ma le aofa’i atoa i le aupaga 67kg senior men.

Na tulaga muamua foi i le pine auro i le Oceania ma le pine auro foi mo le Commonwealth Championships i tausaga ua mavae.

Na mua’i ausia e ia se pine auro mo Samoa i Taaloga a le Pasefika i Saute 2007, ma sau ai lava lana auaunaga mo Samoa seia ausia mai lenei tausaga o loo galue pea.

Sa pine auro i le Oceania Championship i le 2012, pine auro i le Oceania i le 2013, pine apamemea i Taaloga a Commonwealth i le 2014, pine auro i Taaloga a le Pasefika 2015,  Pine auro i le Olimipeka Fa’ailoga (Olympic qualifying) pine Auro mo Ta’aloga a le Commonwealth i le 2017, pine auro i le Oceania i le 2017 ma le pine siliva i Ta’aloga Arafura i lenei tausaga.

I le tausaga 2019, e 5 pine auro a Vaipava sa ia ausiaina i ia taaloga sa faia i Samoa nei.

O toafitu o le au siisii ma ave fua a Samoa o loo i Initia mo le faamoemoe Commonwealth Championships 2023.