Ua tuuina mai se tuualalo a le taitai a le itu agai i le tamaitai Palemia, le afioga Fiame Naomi Mataafa, ina ia faaleaogaina le laisene faatau laau malosi a Laaulialemalietoa.
I se feiloaiga a Tuilaepa Sailele Malielegaoi na nisi o ofisa faasalalau i le vaiaso nei, na saunoa ai Tuilaepa, “O le tuualalo ia Fiame, ia faaleaogaina le laisene faatau fana a Laauli.”
“Ua tatau e le Kapeneta ona silasila toto’a i tulaga ia, aemaise o le Matagaluega Leoleo, ia mata’itu lelei le tulaga lea o le auina mai o laau malosi (fana) i totonu o le atunuu.”
O le mau a Tuilaepa, sa mataitū le vaai mamao a le HRPP i tulaga e ono tutupu mai ai faalavelave e maimau ai soifua o tagata.
“O le mafuaga lea sa faatino ai se faiga lea sa ao uma mai ai i totonu laau malosi poo fana mo le faatama’ia poo le faaleagaina (gun amnesty).”
“O lea faiga sa faatino ao tulai mai le Komesina o Leoleo talu ai, Fuiavalili Eagon Keil.”
Sa fesiligia foi e Tuilaepa le tofa i le Minisita o Leoleo le afioga Faualo Lefau Harry Schuster, i le mafai ai ona toe fai o lea faiga o le faamatuu atu o laisene mo le faaulufaleina ma faatauina o laau malosi, ae ua lava ma totoe laisene o loo iai i le taimi nei.
Peitai ua saunoa Laaulialemalietoa, o le laisene e faaulufale mai ai ma faatau atu laau malosi, ua tele tausaga o loo ia ūumia.
Ae ina ua ulufale atu o ia i le Kapeneta, sa suia ai loa le igoa o le pisinisi ina ia faaauauina e lona alo o Leuatea James.
Saunoa Laaulialemalietoa, o loo mautū uma itu o le laisene, ma sa ūia foi itu uma o le tulafono i le taimi na faamatuuina mai ai oloa.
Saunoa foi Laauli, e lē o se mea fou lea tulaga, ma e iai foi nisi o faleoloa o loo iai a latou laisene, ma e faatau ai laau malosi ma aupega.
“E mafai foi la e ē o loo umia laisene e tusa ai ma le tulafono, ona apalai mo pemita e aumai ai laau malosi mo le faatau atu ia i latou o loo iai maumaga.”
O le Aso Sa na sei mavae atu nei na taofia ai e le Ofisa o Tiute i luga o le uafu tele, se pusa oloa o laau malosi poo fana, seia kilia nisi o vaega.
O le tele o fesili a le au faasalalau na iu ai ina tuuina mai se faamatalaga a le Matagaluega o Leoleo i luga o upega tafailagi.
Ina ua fesiligia le Komesina o le Matagaluega Leoleo Auapaau Logoitino Filipo, sa ia saunoa mai, o lenei pusa oloa, o loo ausia vaega uma e pei o le pemita e faataga ai ona faaulufale mai i totonu o le atunuu.
“O loo iai foi le laisene e faatau ai foi ia ituaiga oloa i totonu o le atunuu, e pei ona aiaia i le Vaega Tolu o le Tulafono, Arms Ordinace 1960.”
(0)
