Ua toaono sui tamaitai ua faamautu i le taimi nei, o le a tauva i le faigapalota i lalo o le faamalu o le vaega faaupufai a le Faatuatua i le Atua Samoa ua Tasi – FAST.
O le afioga ia Afamasaga Leone Mati Masame, o le sui tamaitai o le a tauva mo le itumalo o Aana Alofi 4. O le itumalo lea o loo tula’i mai ai le afioga i le Minisita o Punaoa Faanatura ma le Siosiomaga ia Toeolesulusulu Cedric Schuster.
O le afioga ia Tupaia Faaleo Tuimaseve Tiavasue, o se tamalii o loo galue o se Pule Aoga, lea o le a tauva mo le faigapalota mo le itumalo Sagaga 1. O le itumalo lea o loo tulai mai ai le afioga ia Loau Solamalemalo Keneti Sio, o se sui faipule a le vaega faaupufai e Puipuia le Aia Tatau a Tagata – HRPP.
O le tofā ia Tonuu Fuamoli Amituanai Misi, o se tasi sa galue mo le Matagaluega o Aoga mo ni tausaga se tele, ma o loo galue nei i le Ofisa o le Fono Faavae a lona itumalo o Vaimauga 4, lea o loo tula’i mai ai le afiog ai le Minisita o Leoleo ma Falepuipui le tofa ia Faualo Harry Schuster.
O Vaimauga 4 o loo tuava ai fo’i le sa avea ma Minisita o Faamasinoga mo le HRPP ia Faaolasa Katopau Ainuu faapea le sa avea ma Failautusi o le Maota ia Tiatia Lima Graeme Tualaulelei. E toalima sui tauva mo Vaimauga 4 ia Vaea Ivana Eli.
O le afioga Toomata Nora Leota, o se tamalii sa faaleaogaina e le faamasinoga apili lona nofoa i totonu o le palemene i le tau finauina o le fuainumera o sui tamaitai i lalo o le faavae o Samoa. O le a toe tauva o ia i le itumalo o Anoamaa 1, lea o loo uumia e le afioga ia Fonotoe Pierre Nuafesili Lauofo, o le Sui Taitai o le vaega faaupufai a le HRPP sa avea ma Sui Palemia o Samoa (2011 – 2016).
O le afioga ia Pauli Moana Luamanuvae o se tamaitai sa tele tausaga o loo galue ma tautua i le Ofisa o Malo Tuufaatasi (United Nations). O le a tauva o ia mo le Itumalo o Faasaleleaga 1, lea o loo uumia e le tamaitai Minisita o Faamasinoga ia Matamua Vasati Sili Pulufana.
O le afioga ia Mulipola Anarosa Ale Molioo lea sa fai ma uluai Minisita o Tupe tamaitai i Samoa, o le a toe tauvaina le nofoa o lona itumalo o Palauli 1.
O le faigapalota 2021 e toafitu tamaitai sa tausiniō mai le vaega faaupufai o le FAST. Sa faamanuiaina ai le afioga i le sa’ofaapito ia Fiame Naomi Mataafa o se uluai Palemia tamaitai o Samoa, faapea le afioga ia Mulipola Anarosa Ale Molioo o se uluai Minisita o Tupe tamaitai o Samoa, faapea le afioga ia Matamua Vasati Sili Pulufana na tulai mai i le tofi Minisita o Faamasinoga.
Na taua fo’i e se molimau faatuatuaina e iai nisi sui tinā faaopoopo mai nisi o itumalo o le a momoli atu i le FAST mo le faigapalota tele o loo sauni atu iai Samoa.
Public Notices
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
