Ua Toai Fanua Sa o nai Fanau na Maliliu ao Toesea mo le Sailiga o Manuia o Aiga

0
1230

Ua to’ai mai i fanua sa o nai fanau na maliliu ao toesea mai Samoa ona o sailiga o manuia mo aiga.

O le Aso Sa 17 o le masina nei o Tesema, na taunuu ai i le malae vaalele i Faleolo tino maliliu o Aleseana Aniterea, Aperaamo Tapelu, David Gasologa ma Derick Peketi.

O le Minista o loo ua gafa nei ma le vaaia o galuega faavaitaimi, le Afioga ia Lautimuia Uelese Afoa Vaai, na fai ma Sui o le Malo e momoli le saunoaga faalaeiau.

Saunoa Lautimuia, “Talofa ua tatou feiloai i loimata maligi ma le faanoanoa. I le taunuu mai o le sa Alesana, APeraamo, David ma Derick.”

“Ua le ogotasi le futia ma le umele i le faatamasaoliga a nai alo ma fanau, ae a le tapuaiga mau a aiga, nuu ma ekalesia, le sailiga manuia e tauala i le polokalame a le tatou Malo, o galuega faavaitaimi mo atunuu i fafo.”

“Talofa, sa lilo i manatu nei mala ma nei faalavelave, e leai foi se isi o i tatou e manao i mala faapenei. Peitai e moemoe i manu ae sau mala atiae, ae o le finagalo tutasi o le tatou tapaau sili i le lagi.”

O se sauniga puupuu na faatino lea i le malae vaalele i le taunuu mai o tino maliliu, na taitaia lea e le Failautusi o le Mafutaga o Ekalesia Soofaatasi, le Susuga ia Rev. Maauga Motu.

O le maea o lea sauniga, ona momoli atu lea o tino maliiu e latou aiga mo oliolisaga tumau.

O le ogatotonu o lenei tausaga na tuua ai e i latou nei Samoa mo Ausetalia, ma le faamoemoe e iva masina o le konekarate.

Peitai, ua fano soifua ona o se faalavelave tau taavale na aafia ai, i le maea ai o se tafaoga na asiasi ai i nisi foi o tama fanau Samoa o loo aumau i totonu o Ausetalia mo galuega faavaitaimi.