“Ua Tatau Ona Sii i le $5 i le Itula Totogi Amata o Tagata Faigaluega e Fua i le Tau o le Soifuaga ua iai nei

0
5065

Ua tatau ona sii i le $5 i le itula le totogi amata o tagata faigaluega e fua i le tau o le soifuaga.” O le saunoaga lea a le Susuga ia Seveaoga Saina Tomi Setu, o le tamaitai pule o le faalapotopotoga o le iuni o tagata faigaluega, o le Samoa First Union.

Saunoa Seveaoga, “E le o toe gafatia e le tupe maua, poo le totogi o le vaiaso, le tau o le soifuaga i le taimi nei.”

“O le $2.30 ma le $3 i le itula, o loo fa’aaoga e le tele o kamupani, e na o le $100 ma sene i le vaiaso. Ae a fua i le tau o le pusa moa le ua iai i Savaii, ua $100 i le pusa moa.”

“Ua manaomia ona fai se fesuiaiga mo se siitaga alofa mo le tagata faigaluega.”

O le taeao o le Aso Lulu, na tauaofia ai sui auai o le faalapotopotoga, Samoa National Tripartite, e talanoaina ai le tulaga o totogi amata a soo se tagata faigaluega, ae faapito lava i kamupani.

O le feiloaiga mo le soalaupulega o finagalo eseese, na auai ai fauluuluga o kamupani ma faalapotopotoga tumaoti, aemaise pa’aga. O Matagaluega o Pisinisi, Alamanuia ma Leipa, o loo ta’imua nei faatalanoaga e sui ai finagalo faalia.

O le mau tauave o le faalapotopotoga iuni o tagata faigaluega, ia siitia i le $5 i le itula, e fua i le tau o le soifuaga o loo iai nei.

E le’i maua se iuga ae o le a toe faatulaga e MCIL se isi aso, e toe faatalanoa ai le mataupu.

O le Samoa First Union, na faavae i le tausaga 2015, ma ua faatupula’ia le tele o faalapotopotoga o loo latou fai pa’aga. O le faalapotopotoga foi nei, o loo tulai mo tagata e aafia i i faafitauli e ala i le faatalatalanoaina o nisi o mataupu o loo sulufai mai ai le atunuu, ona o aafiaga i totonu o fale faigaluega, a o le’i oo atu i le tulafono.

O le Samoa First Union o loo galulue soosoo tauau ma iuni i Niu Sila ma Ausetalia, aemaise o seleni (supa) a nai o tatou tagata o loo galulue i galuega faavaitaimi i totonu o Ausetalia.