“Ua Tatau Ona Ave Atoa Le Faamuamua ina ia Tafi Esea le Mala o le Sauaina lea o Tina, Tamaitai ma Tamaiti.”

0
541
Le Afioga ia Mulipola Anarosa Molioo, i le tatalaina o le 16 Aso o Taumafaiga e Tetee Atu i Sauaga i Totonu o Aiga Photo: Rodney Leiataua (SGN)

“O se tulaga pagatia ua iai nei Samoa, ma e tatau ona ave atoa le faamuamua, ina ia tafi esea le mala o le sauaina lea o tina, tamaitai ma tamaiti”

O le saunoaga lea a le Minisita o Tina ma Tamaitai Nuu ma Agafesootai, le Afioga ia Mulipola Anarosa Molioo, i le tatalaina aloaia o le 16 Aso o Faatinoga e Tetee Atu ai i Sauaga o Tina ma Tamaitai mo le tausaga 2023.

Saunoa le tamaitai minisita, “I se suesuega sa faatino i le 2018, o loo manino ai le tele o le faafitauli i sauaina o tina ma taimaitai.”

Na ripotia e lea suesuega le 87% o fanau o loo aafia i sauaga i totonu o aiga. O le 86% o fanau, o loo aafia i sauaga o le kiki, tu’i ma isi sauaga, ae 9.5% o tamaitai na ripotia sa faamalosi lava i tagata o latou lava aiga.

I tagata matutua, e 86% o tina ma tamaitai nofo tane sa aafia i sauaga e pei o le kiki, tu’i ma le faaaogaina o mea malo e faaoo iai le sauaga. 87% na sauaina e ala i le e’e ma le faaaogaina o upu malosi. 24% o tina ma tamaitai na sauaina i le titinaina o le ua (strangling) ae 87% na foo iai le faafefe, ma sauaina faaletino.

Ua talafeuga faamaumauga na saunoa iai Mulipola Anarosa, ma le saunoaga a le Sui Komesina a le Matagaluega o Leoleo,  le Susuga Papalii Efo Moalele.

Saunoa le Sui Komesina, “O loo numera silia soligatulafono e mafua mai sauaga totonu o aiga, nai lo se isi lava solitulafono. O loo faamauina e 569 mataupu na oo atu le ofisa leoleo tau sauaga totonu o aiga.”