Ua tapena le Tausala o Samoa e Tauva mo le Sailia o se Lalelei o le Pasefika

"Ia tapuai maia lou atunuu Samoa, ae sei ou alu ou te tau aua se ai mo Samoa."

0
31

Ua tapena le tausala o Samoa e tauva mo le sailia o se lalelei o le Pasefika (Miss Pacific Islands).

I se feiloaiga a le Tausala o Samoa  Moemoana Safa’ato’a Schwenke ma le vasega o tusitala i le taeao o le Aso Gafua 22 Ianuari i le maota o le Pulega o Tagata Tafafao Maimoa mai Fafo le STA, na ia faailoa ai le agaga o lona auai atu ai i lenei tauvaga mo Samoa.

E lē o ia, ae o le faamoemoe atoa o lona auai, o le atunuu, o le fatu o le atunuu (heart of Samoa).

Saunoa Moemoana, e maualuga lana vaai ia Samoa, ma e le tuumamaina iā te ia lona tauaevina o le igoa o Samoa i lenei tauvaga.

Na ia faafetaia le faaeaea maualuga a le atunuu mai le fā masina lenei ua savalia o ia tauaveaina le tofiga.

E lagona le fiafia ma le faagaeetia.

“Ia tapuai maia lou atunuu Samoa, ae sei ou alu ou te tau aua se ai mo Samoa.”

Ua faailoa foi e le sui o le Onomea Production, le tulaga sologa lelei o loo iai taumafaiga ma tapenapenaga uma.

O loo vaavaalua ai le Onomea ma le Pulega o Tagata Tafafao Maimoa, le STA, auā le faamoemoe o le sailiga o se lalelei o le Pasefika.

O le Aso Lulu 24 o Ianuari lea e faamoemoe e tuua ai e le tausala Samoa faapea le aumalaga e lagolagoina tapenaga uma.