Ua Tapena le Komisi Suesue o Faigapalota e Tuuina atu le Lipoti i le Palemene o Samoa

0
2853
Tuuu Luafatasaga Dr Ieti Taulealo and Peseta Afoa Arasi Tiotio.

Ua tapena le Komisi Suesue o Faigapalota e tuu faatasia le latou ripoti mo le faaooina atu i totonu o le Palemene.

I se faatalatalanoaga ma le afioga ia Tuuu Luafatasaga Ieti Taulealo i le vaiaso nei, na ia saunoa ai i nisi o mataupu sa lagā i finagalo faalia.

Ua ma’ea ona faasopolia uma itumalo eseese o Upolu ma le motu tele i Salafai, e tusa o le latou galuega o le aoina mai lea o finagalo eseese o le mamalu o le atunuu.

Saunoa foi Tu’uu o loo tele foi nisi sa faaoo mai finagalo tusitusia, faapea foi ma nai o tatou tagatanuu o loo aumau i atunuu i fafo, sa tuuina mai i luga o upegatafailagi poo le website a latou finagalo tusitusia.

“I la’u ia lava maitau na o a’u, e foliga mai o loo mafuli finagalo o le atunuu i le tatala lea o avanoa ina ia palota mai ai tagata o loo alala ma papa’aao i atunuu i fafo”.

Saunoa Tuuu, o le itu tāua o le sailia lea o ni auala e mafai ai ona faatino lea manaoga o le palota mai o tagatanuu Samoa o loo i fafo.

Sa faamanatu mai e Tuuu, o loo iai lava le avanoa e palota ai tagatanuu o loo nonofo i atunuu i fafo, i le taimi nei. Pe afai ua resitaraina, ma malaga mai i Samoa i le aso o le faigapalota.

O lana tilotilo, “O le auala faigofie lava o le oso i le vaalele ma agai mai i Samoa e faatino ai le palota, e pei o loo iai i le taimi nei.”

O le isi itu o loo malosi iai lagona ma finagalo, o le toe tuutuu lea i lalo o tausaga e mafai ai ona agavaa le tagata mo le palota. O le 21 o loo iai i le taimi nei.

Ua maitauina e le taitaifono nisi o lagona, i le tatau ai lea ona agavaa fanau e atoa tausaga faatapulaaina mo le palota i le masina o loo sosoo ma le masina o faigapalota.

O se faataitaiga, o Aperila le palota ae atoa ia Me poo se isi masina i tua mai le 21 o tausaga e mafai ai ona faatino faigapalota.

Saunoa Tu’uu, atonu e manaia tele, aua e pei o latou ia o loo faamoemoe ai se leo o le atunuu ma tonu fai mo le atunuu.”

O le isi foi tulaga na malosi mai ai finagalo o le atunuu, o le tulaga lea i itumalo faapalota.

“O le tele lava o finagalo, ia toe faafoi Samoa i le vaevaega o itumalo na faataoto mai e nai o tatou tua’a ua lagomau mai tia sa..”

Saunoa le Taitaifono o le Komisi Suesue o Faigapalota, o le masina o Novema lea ua faatulaga e tatau ona oo mai ai i luma o le Palemene le latou ripoti.

“Pei ona silafia, o se taimi muamua lea ua faatuina ai se Komisi Suesue, mai nisi ua malolo ritaea mai tiute ma feau i fale faigaluega poo matagaluega, ma nisi foi sa malaga i galuega faatalai poo le faafaifeau, ae lē pei o nisi o tausaga, lea sa filifilia mai ai sui o komiti mai nisi sa tauva i faigapalota ae ua le manuia latou taumafaiga.

Saunoa foi Tu’uu o loo tele foi nisi sa faaoo mai finagalo tusitusia o nai o tatou tagata o loo i atunuu i fafo, o loo tuuina mai luga o upegatafailagi poo le website.