“Ua ou sauni e faa’aoga lo’u tagata i soo se vaega e valaauina ai a’u mo lana galuega”
O le saunoaga tautino lea a le susuga i le faifeau faauu ia Apelu Faaniniva, o se tasi o auauna ua faamanuiaina ina ua ia ausia se faailoga maualuga, o le Masters in Theology mai le Kolisi i Piula – Piula Theological College.
O Apelu, 44, ma le faletua ia Fofoga e aumau i Brisbane, Ausetalia, ae na sue mai i suega ulufale a le Kolisi Faafaifeau i Piula i le 2015, ma ulufale ai loa i lena lava tausaga.
O lea ua maea ai nei le soifua aoaoina mo tausaga e fitu, ma ua faamanuiaina ai loa i le Bachelor ma sosoo ai lava ma le faailoga o le Masters.
Saunoa Apelu i se faatalatalanoaga ma le Samoa Global News, “ua ou tapena lava e faa’aoga lo’u faatauvaa ou te tautua ai i soo se vaega o le galuega a le Matai e filifilia ai a’u..”
Na ta’ua e Apelu, e tele lava luitau sa feagai ma i la’ua ma si ona toalua ao iai i totonu o lamua mo aoaoga, e pei o le leai o se avanoa e mafuta ai ma le fanau faapea foi matua, aemaise o le tau faavaivai i taimi e oo mai ai ma’i o le tino.
“Peitai, sa tulivae lava Le Atua ma tuu atu lava i ona luma faafitauli o lenei olaga, ae faafetai sa tali mai lava Le Atua ma faatonutonu folau mai le savaliga ma le faigamalaga. Aemaise o lea ua tali faa’aliali Le Atua e tusa ai ma le taunuuga o le finauga ma le tauiviga..
“Viia Le Alii, e talitonu lava e lē o le tagata ae foi lava le viiga i ē ou le viiga.”
O le susuga ia Apelu e sau mai le afioaga o Tuanai, ae o le faletua ia Fofoga, e sau mai Salelologa ma Tiavea.
I le taualuga ai o le fonotaga a le Ekalesia Metotisi i le faaiuga o le vaiaso ua tea nei, sa lauina ai tusi tofiga a le Ekalesia, lea ua filifilia ai le susuga ia Apelu e galue i le ofisa autu o le Ekalesia Metotisi, ma avea ai o ia ma taitai e vaaia le Polokalame a le Ekalesia ua faaigoaina o le Tulituli Matagau.
O le susuga i le faifeau ia Apelu o se alo e faasino i le tama ia Setu ma le tina ia Tausaga, lea foi sa galulue faa faifeau i le Ekalesia Metotisi mo le tele o tausaga, ae lei malolo penisione i lā’ua.
E mālolo tua’a o Apelu mai le tofiga faifeau a le Ekalesia Metotisi, o avea i laua ma Sea i le matagaluega o Ausetalia i Matu.
- Leai Se Sui o le Malo e Talia Saunoaga o le Savali O Le Filemu - December 8, 2023
- “Ua Tatau Ona Sii i le $5 i le Itula Totogi Amata o Tagata Faigaluega e Fua i le Tau o le Soifuaga ua iai nei - December 8, 2023
- Silia ma le $16,000 le Tau o Meatotino sa Gaoia mai le Maota o le Komesina o Tineimu - December 6, 2023
