Molimau lē sa vaai tino lava i le faalavelave na tupu i Vailoa

0
1928
Gafa Siona Faamausili Tauafao.

O Gafa Siona Faamausili Tauafao, mai le afioaga o Malie o loo masalomia sa ia avea le taavale sa maliu ai se tamaita’i Saina i Vailoa i le taeao o le Aso Sa 24 Setema 2023.

O le vaiaso nei sa amata suesueina ai molimau a le itu a leoleo i lea faalavelave, ona o loo teena e Gafa Siona ona moliaga o le ave taavale matautia ua mafua ai le maliu (dangerous driving causing death) faapea le tauaveina lea o se taavale e le’i laiseneina faaletulafono.

I le molimau tuu fofoga a Norman Williams, 32 tausaga mai Vailoa, na ia tāua ai, o ia sa faatau i’a i lea taeao pō o le Aso Sa, ao faatau i’a o ia i autafa o le auala.

Sa ia iloa atu se van na sau ma tu mai i le isi itu auala. Sa oso mai i fafo le tamaitai Saina lea sa aafia, ma kolosi mai le auala ma le faamoemoe e sau e faatau i’a.

Peitai, o le taimi tonu lena, o loo agai mai ai le tuuga taavale e agai mai Sisifo e aga’i i Apia.

“O le taxi ma le Hyundai Getz o loo mili mai ai.”

O le molimau a Williams, o le taimi tonu na pāsia ai e le Getz le taxi, na lavea ai ma le tamaita’i Saina.

Sa faailoa e Norman, o ia na muamua taunu’u i le tamaita’i sa lelea mai autafa o le auala pe ā ma le 15 mita, ma o ia foi na vaai tino lava i le faalavelave na tupu.

Sa faaauau pea le miliga a nei taavale e lua, e le’i tu se taavale i le taimi na lavea ai le tamaita’i Saina, ma e le’i oo ane foi ave taavale e faailoa i le ofisa o leoleo le mea na tupu.

Ina ua tula’i mai lea faalavelave i le masina Setema o le tausaga talu ai, na faasalalau ai e le Matagaluega o Leoleo le moomia ai o se faamatalaga e tau sailia ai lē sa avea nei taavale na tupu ai le faalavelave.

Sa faasalalau lava e leoleo i lena taimi se Hyundai Getz lanu paepae o loo masalomia.

O Gafa Siona, sa lipotia e le Samoa Global News le tatala ai o ia i tua (bail) ia Fepuari 2022, ina ua molia mai se osofaiga tau fualaau faasaina a leoleo i Vaitele-Fou iā Tesema 2021.

O loo teena e Siona o ia sa maliu ai le tamaita’i Saina. Ae o loo ia ioeina sa ia avea le taavale, ma o se taavale fo’i e le’i lesitalaina.

E toalima molimau a le itu a leoleo o loo valaau i luma o afioga ia Leiataualesa Daryl Clark o le Faamasinoga Maualuga.

O le tamaitai loia ia Cata Seiuli o loo tulai mo lē o loo molia nei.