E 31 sui fou ua momoli atu e o latou itumalo e tauva mo le faigapalota, i lalo o le tagavai a le Faatuatua i le Atua Samoa ua Tasi (FAST).
O lenei mataupu na saunoa iai le taitaifono, le afioga ia Laaulialemalietoa Leauatea Polataivao Schmidt, i se feiloaiga faalevaiaso o le Fofola le Fala ma le au Tusitala i le faaiuga o le vaiaso na te’a nei.
Saunoa Laauli, “O le 31 o sui fou, ua aofia ai itumalo e sefululima o Minisita, ma le 18 o itumalo o loo uumia e sui o le Vaega Faaupufai e Puipuia Aia Tatau a Tagata poo le HRPP.
“Ae o loo tumau pea itumalo o sui faipule e to’a 20 a le FAST o loo iai i le taimi nei.”
O le talitonuga o le taitaifono ua latou lava tapena mo se faigapalota i soo se taimi e valaauina ai.
Mai Itumalo Palota e 51 o Samoa, o lea ua atoa lelei ma tofu le Itumalo, ma le Sui Tauva e tauaveina le tagavai a le Faatuatua i Le Atua Samoa ua Tasi.
Saunoa Laaulialemalietoa, “Pau le auala e maua ai le to’afilemu o le vevesi o loo iai nei, o le toe fo’i e faatino le faigapalota a le atunuu.”
O le feiloaiga a Sui Faipule o le vaega faaupufai ma le mamalu o le atunuu i le motu tele i Salafai i le vaiaso talu ai i Salelologa, na molimauina ai le tumutumu o le atunuu, na lolofi ane e faaali lo latou lagolago mo le vaega faaupufai.
O lea faatasiga, sa faatino ai foi ma le resitalaina o sui lagolago o loo faamautu i Savaii.
O le vaaiga foi lava lea e tasi na molimauina i Tumua nei, i se feiloaiga a le mamalu o le atunuu ma Sui Faipule o le vaega faaupufai, lea na faatino i le Maota o Samoa i Vaitele.
Na faasalalauina foi i luga o upega tafailagi le tulaga lava lea e tasi; i le toatele o sui lagolago na molimauina i feiloaiga sa faatino mai vaega eseese o Ausetalia, Niu Sila ma Amerika.
Ua faailoa e Laauli; ua tatau lava ona toe fo’i le Malo e fesiligia se finagalo o le atunuu, ma toe totofi mai nisi e taitaia le atunuu.
Available now at SOS
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
