E lua ni mataupu ogaoga ua i luma nei o le faamasinoga e mafua mai i le taumafai lea o nisi o le atunuu e faaaoga tusi folau e resitala ai mo le faigapalota o loo loma nei.
Ua faailoa e le taitai a le Malo Tausi le afioga ia Fiame Naomi Matāafa i se feiloaiga ma le vasega o tusitala, “E fai si ma’aleale tele o lenei mataupu ona o loo aafia ai foi ma le Ofisa o Femagalaiga (Samoa Immigration) i le tulaga o le tusi folau poo le passport lea sa taumafai e faatino ai le resitala.”
Saunoa Fiame, o le pepa fanau e faatino ai le tusi folau, ma o le aafiaga lea o le Ofisa Femagalaiga ona o le faatinoga o le tusi folau.
O faafitauli lea sa feagai ma le Ofisa o Faigapalota, o le tuuina atu lea o faamaumauga sese, ma taitaina sēsē ai le faatinoga o le galuega a le Ofisa, e pei ona saunoa le Komesina o Faigapalota le afioga ia Tuiafelolo Toleafoa John Stanley.
E ese mai i mataupu nei e lua e aafia ai tusifolau, o loo iai foi nisi mataupu e pei o le taumafai lea o nisi e faaaoga pepa fanau o isi tagata e resitala ai.
Na maua le avanoa e fesiligia ai le Komesina o Faigapalota i sona finagalo, peitai, na ia saunoa, “O le mataala o le aufaigaluega lea o loo maua ai nei faiga taufaasēsē, ma o le faailoga lea o le lava tapena ma le lava saunia o le aufaigaluega a le Ofisa o Faigapalota mo le faatinoga o le resitala mo le mamalu o le atunuu.”
I le kalena a le ofisa o faigapalota e lua vaiaso o loo faatino ai le iloiloga ma le totoa o lola palota mo itumalo e 51, ae o le Aso 28 o Iulai o le a faamauina aloaia ai loa suafa i le Lola Palota.
O loo iai nei Samoa i le piriota e resitara ai sui tauva (nomination period) lea o loo tatala sei oo atu i le 12pm o le Aso Toanai nei 12 Iulai.
O le Aso 14 Iulai agai le ASo 24 o Aukuso le piriota lea mo faalauiloa e le gata o vaega faaupufai ae faapea foi faalauiloa mo sui tauva.
E le o se piriota mo faatosina i tupe ma mea taumafa e pei ona ave sese i nisi, ae o le piriota mo le faalauiloa ma le faatosina atu o tagata e ala lea i le faalauiloa o agavaa ma talitonuga o sui tauva ma vaega faaupufai.
O le tuuina atu o tupe poo nisi auala e faatauina ai le palota, e matuai faasaina lava e le tulafono.
O le Aso 21 – 24 Iulai o le avanoa lea mo aoaoga a le au faipalota mo Upolu nei ae o le Aso 28 Iulai ua atofaina mo Salafai.
O le faaiuga o le vaiaso ua mavae na tapunia ai le avanoa e resitala ai le atunuu mo le faigapalota, ma ua faamauina e toa 102,199 le aofai o le atunuu ua ma’ea resitala tusa lea ma le 87%. Mai le 117,225 – o lona uiga e silia ma le 15,000 e lei resitalaina.
Ua faailoa e le taitai o le atunuu, e ono iai ni fesuiaga i lea fuainumera i le lumanai, pe a maea lelei le galuega a le Ofisa e iloiloina ai suafa ao lei faamauina aloaia i le Lola Palota a Samoa mo itumalo taitasi.
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
