Ua faatuputupulaia le aofai o malu o leoleo ua pesia i le faamai

0
871

I se faatalatalanoaga ma le Sui komesina o leoleo le afioga Auapaau Logoitino Filipo, na saunoa ai Auapaau, “ua silia ma le 80 leoleo ua pesia ma aafia i le faama’i,” o se tulaga o loo tilotilo iai ma le toto’a le pulega i lea itu, ae maise pe afai e siisii pea i luga ma faatuputupula’ia.

O le saunoaga a le Sui Komesina, e pau le itu o loo tau maua mai ai se faamāmā avega i le faafitauli, o le maitauina lea o nisi sui o le Matagaluega sa aafia, ae ua vave foi ona toe malolosi, ma ua faalua foi ona fai suega (testing), o loo negative.

Saunoa Auapaau, o poloka poo checkpoint a leoleo o loo faatino nei i luga o le auala, ma isi vaega o nofoaga o loo faatino ai tui puipui poo suega, o vaega tonu ia o loo aafia mai ai leoleo i le faama’i.

Ae o se tala lata mai o le vavao, ua silia ma le 50 tagata ua faapena ona faasalaina e le matagaluega i sala tupe $200 ona o le lē usitaia o tapu o le vavo, ae tolu ni supamaketi ua faasalaina i le sala tupe e $5,000 tala, ona o le lē usitaia o le taimi faatulagaina o le 5 i le afiafi lea sa tapunia ai faleoloa i le Aso Toanai. E iai foi se aulotu ua tuuina atu iai se faasalaga tupe $5,000 i le lē usitaia o tulafono.

Ua tuu’alalo mai ai ma le Sui Komesina i le mamalu o le atunuu, ia tautuana tapu ma vavao ia usitaia. Ua tatalo mai foi le matagaluega i le atunuu, ina ia tatou galulue faatasi aua le soagalemu o Samoa.

Faasalalauga Taua