Ua Faaititia Vailoloa ma Vaomatua, e maua ai Oloa Faalenatura ma ono Aafia ai le Lumanai Manuia o Samoa

0
67

Ua maitauina e le Matagaluega o Punaoa Faalenatura ma le Siosiomaga le faaititia o vailoloa ma vaomatua, o loo mafai ai ona aumaia oloa faalenatura o le okesene (oxygen) ma le kaponi (carbon dioxide).

O le aso faataua o vailoloa ma vaomatua sa faalauiloaina e le Matagaluega i le Aso Lua 4 Aperila i le EFKS Hall i Mulinuu.

Toeolesulusulu Cedric Schuster ma nisi o le fanau sa auai i le polokalame faalauiloa.

I le saunoaga autu a le afioga i le Minisita, Toeolesulusulu Cedric Schuster, sa ia toe faalauiloaina ai faafitauli o loo taumafai malosi le Matagaluega e foia e pei o le soona tāina i lalo o laau, ae maise pe a kilia e fai ai faatoaga.

O nisi faafitauli tulai mai o le faaleagaina o vaomatua ona o lologa ma matagi afa.

Na saunoa foi le Minisita i le faaleagaina o le siosiomaga ona o lapisi lafoai e le mamalu o le atunuu, atoa ai ma le tafe atu o uta lafoai i le sami poo le gataifale.

O le isi faafitauli o le tanuina o eleele tu lata i le sami ona o le fausiaina o maota ma laoa.

“O ia vaega uma poo faafitauli o loo feagai ma le Matagaluega o loo galulue i ni auala ma se vave e fōia ai.”

O le polokalame o le aso faapitoa sa molimauina e le mamalu le au valaaulia, faapea sui o nuu ma afioaga i le Maota o le EFKs i Sogi.

Sa auai ai foi ma le toatele o alo ma fanau a’oga aua lava le faatāuaina o le latou silafia o nei feau taua.

“O a tatou fanau o le a aafia tele pe afai e le fofoina faafitauli faalenatura o loo feagai ma tatou i le taimi nei.’

Minisita Lagolago o le Matagaluega o Punaoa Faalenatura ma le Siosiomaga. Faleomavaega Fuimaono Dickie Tafua.

O le Minisita Lagolago o le Matagaluega, le afioga ia Faleomavaega Fuimaono Titimaea Tafua, sa ia ootiina le lipine o lenei aso faapitoa.

Fea’u Tāua mo Oe ma Au

Please Keep our Beautiful Samoa Clean. Faamolemole – aua le lafoai lapisi i autafa o tatou aualatetele. 📷 SGN.
O se feau tāua mai le auaunaga a le Ofisa o Turisi, STA.