Ua Avanoa le Tofiga ‘Komesina o le Toefuataina o Tulafono’

0
108

O le aso Lua o le vaiaso nei na muta ai le auaunaga a le sa avea ma Komesina o le Ofisa Toefuataina o Tulafono poo le Samoa Law Reform Commission, le afioga Teleia’i Dr Lalotoa Mulitalo Seumanutafa.

O le tolu vaiaso talu ai na tuuina atu ai e Teleia’i lana tusi faamavae i le Komisi o Tagata Faigaluega le Malo (Public Services Commissioner).

O le afioga Teleia’i ua faalua ona filifilia e avea ma faauluuluga o lea foi itu tino le Malo, ma o ia ua atoa ai le toatolu o tamaitai ua se’ei lea tofiga maualuga o le Komesina Toefuataina Tulafono, talu ona faavae mai i le tausaga 2008.

O le afioga Teleia’i Dr Lalotoa Mulitalo Seumanutafa, o ia o se loia, e tele ni auaunaga poo Matagaluega le Malo sa galue ma tautua ai.

Sa ia tusia foi se tasi o lomiga ua faaigoaina “Law Reform in Plural Societies” lea na faalauiloa e le Iunivesete Aoao o Samoa.

Sa saunoa le Minisita o Faamasinoga, Matamua Vasati Pulufana Sili e faailoa se lagona o le Malo e faafetaia ai le auaunaga a Teleiai.

Sa saunoa foi Teleiai, ua viia Le Alii ua aulia mai ma maea le 6 tausaga o lana auaunaga. O Le Atua lava sa faalagolago iai i lona tulai mai.

Ae o le lagona faafetai tele ona ua mafai ona faamaeaina nisi o poloketi, ma ua ia lagona foi, o le a tofiaina foi e Le Atua se tasi e sosoo ma ia e faaauauina le galuega.