Tusia: Pesetā Tusiga Taofiga I le ta tonu o le itulā e 8:00 anapo [Aso Faraile, 13 Iuni 2025], na fa’amauina ai e le Ofisa o le Komisi o Faigā Palota [O.E.C.], le ausia o le 76,844 tagata ua uma ona lesitala atoatoa mo le Palota Tele 2025.
O lona uiga, ua 66% o i latou e tatau ona palota, ua faia a latou lesitala ma ua i ai fo’i o latou igoa i lola palota a o latou Itumālō Palota.
Mo le silafia, o le aofa’i atoa o tagata e tatau ona palota e 117,225, o lona uiga toe 34% e le’i lesitalaina tusa lea ma le 40,381 tagata.
O lo’o fa’amauina fo’i e le O.E.C. e 6,282 tagata na fa’aāogaina le auaunaga a le Ofisa i luga o ‘upega tafa’ilagi e lesitala ai [Online Portal], peita’i na’o le 2,872 tagata ua mae’a atoatoa a latou lesitala.
I lea aofa’iga, na’o le to’a 12 tagata Samoa o lo’o nonofo mau i atunu’u i fafo ua lesitala atoatoa, a’o le isi 2,860 o i latou lava o lo’o aumau i totonu o Samoa.
I lea aofa’i e to’a 12;
✅️: Amerika Samoa – 2 tagata
✅️: Ausetalia – 2 tagata
✅️: Fiti – 1 tagata
✅️: Niu Sila – 5 tagata
✅️: Filipino – 1 tagata
✅️: Amerika – 1 tagata
O lo’o molimauina pea le tumutumu o le mamalu o le atunu’u i nofoaga ua atofaina auā le galuega lesitala, e aofia ai le Fale Ta’alo i Tuana’imato, Maota Fono o le TATTE i Sogi, Ofisa Autū o le O.E.C. i Mulinu’u ma le Maota o le Ekalesia Metotisi – Apita o Pisaga i Salelologa, Savai’i.
O le tu’uālalo a le afioga iā Toleafoa Tuiafelolo Alexander John Stanley, o le Komesina o Faigā Palota i le mamalu o le atunu’u, ina ia vave afifio ane e lesitala ina ia ‘aua ne’i toe tigāina mulimuli ane e tau totogi fa’asalaga ua aiaia fa’aletulafono, e mafua i le fa’atamala ma le fa’ata’eta’eāluga o le tāua ma le fa’amamafa e ‘ave i Faigā Filifiliga Aoao a Samoa o lo’o totofi ai ona Ta’ita’i.
O le vaiaso muamua o Iulai, ua folasia e le Ofisa, o le ā tapunia ai lenei galuega lesitala.
Afai e te lē lesitala, ua mautinoa fo’i e lē mafai ona e palota. Lesitala nei loa ma palota.
Faasalalauga mai le UTOS
- 194,267 Tagatanuu o Samoa sa maua le ta’i $150 tala - June 28, 2026
- A Fealofani tatou o Ta’ita’i – e Toafilemu foi le Atunu’u - June 27, 2026
- Pāsia Aloaia le Tala Faatatau Autu o le Tupe 2026/2027 - June 27, 2026
