Tuuina mai se poloaiga a le Faamasinoga Maualuga e taofia le tumau ai galuega a Afega i Leauvaa

0
355

Ua tuuina mai se poloaiga a le Faamasinoga Maualuga e taofia le tumau ai galuega a le afioaga o Afega.

I le iloiloina ai e le Faamasinoga Maualuga o lenei lava mataupu tau eleele i le va o Afega ma Leauvaa, sa tuuina mai ai se poloaiga a le Faamasinoga i le vaiaso nei, ina ia taofia mo se taimi le tumau galuega a le afioaga o Afega o loo faia i fanua poo eleele o loo tua atu o le 723 eka sa foaiina mo Leauvaa.

O lenei poloaiga sa fofogaina e le Faamasino Sili le afioga iā Satiu Simativa Perese i le vaiaso nei.

O le tamaitai loia le afioga iā Sala Josephine Stowers sa finau malosi i lona tula’i ai mo Leauvaa.

Sa ia talosagaina se poloaiga a le Faamasinoga e taofia ai le faatinoga o galuega a Afega, ona ua oia le aia tatau faaletagata soifua, aemaise o loo iai talosaga apili poo talosaga toe iloilo i faaiuga a le Faamasinoga o Fanua ma Suafa.

Sa finauina le mataupu, i le tali mai foi a le tamaitai loia o loo tulai mo Afega ia Tanya Toailoa – e leai se malosiaga a le Faamasinoga Maualuga na te faia ai se faaiuga i se mataupu ua maea ona faia iai le faaiuga le Faamasinoga a Fanua ma Suafa.

Peitai, ona o le tagi a Leauvaa o loo tuuina atu i le Faamasinoga Maualuga i luga o le mau ua oia aia tatau tau le Faavae o tagata (constitutional rights), lea e tele le avanoa mo soo se isi e tagi ai i le Faamasinoga Maualuga.

O le isi itu sa finau iai le loia a Afega, e le tatau e le Faamasinoga Maualuga ona faia sana poloaiga ae le’i tuuina atu se tali poo se finauga a Alii ma Faipule o Afega.

Peitai o le itu tonu lena o loo tuuina mai ai le poloaiga le tumau a le Faamasinoga Maualuga e pei ona tuuina mai e le Faamasino Sili ia Satiu Simativa Perese.

O le vaiaso fou e atoa ma muta iai le piriota na tuuina mai e le Faamasinoga o Fanua ma Suafa i aiga o le afioaga o Leauvaa, e tapena ese ai mai le nofoia faasolitulafono o eleele o loo i tua atu o le 723 eka.

E pei ona tuuina mai i ni faaiuga e fia a le Faamasinoga o Fanua ma Suafa, o eleele ia e pulea e Alii ma Faipule a le afioaga o Afega.

Ua savali nei le iva faaiuga ua tuuina mai e le Faamasinoga o Fanua ma Suafa, lea o loo faatumauina ai le pule a le afioaga o Afega o eleele le o loo nofoia e nisi o le afioaga o Leauvaa.

O le Ofisa o le Loia Sili o loo tulai mo le itu a le Faamasinoga o Fanua ma Suafa, lea e tolu ai itu o lenei mataupu.

O le a fa’aauau pea folasaga (submissions) a loia e tuuina atu mo le iloiloina o lenei mataupu tāua, e uiga i Faaiuga a le Faamasinoga o Fanua ma Suafa, ma le aafia o aia tatau a tagata (constitutional rights) e pei ona tuuina mai ai se finauga le loia mo Leauvaa.

O galuega a le afioaga o Afega o loo faatinoina nei, ua ma’ea ai ona ta ma tuu i lalo laau ma faatoaga, o togalaau aina o loo tua atu o maota ma laoa, faapea soo se atinae i autafa ma luma o fale o aiga o loo nofoia eleele poo fanua i tua atu o le 723 eka.

Na o fale o aiga sa tuu avanoa iai le faataunuuina o le galuega a Afega – ma tuuina atu se taimi e tapena ese ai fale ma mea totino a aiga.

O Levi Saleimoa ma Tuanai isi foi afioaga o loo aafia i le mataupu lava lea e tasi e pei ona aafia ai Leauvaa – i tua atu o le 723 eka na foai mo Leauvaa ina ua sosola mai le afi tele (volcano erruption) o le Mauga o Matavanu, i le tausaga 1905 i le 1911.