Tuuina mai le Tuualalo a le Matagaluega ina ua Faamauina le Siitia o le Numera o le Pule i le Ola i Samoa

Maitauina e le Matagaluega o Leoleo le faatuputupula’ia pea ma le siitia o le fuainumera o le pule i le ola i Samoa.

I se feiloaiga a ofisa faasalalau ma le Matagaluega a Leoleo, na saunoa ai le Sui Komesina, Papalii Monalisa Tiai-Keti i le maitauina ma le toto’a o le siitia pea i luga o le fuainumera o i latou ua pule le ola i totonu lava o le tausaga 2022, pe a faatusa atu i le tausaga ua mavae.

Ua lagā se finagalo o le Matagaluega ona o le vaiaso na mavae atu nei sa tulai mai ai se isi foi maliu, ma ua oo atu ai le fuainumera i faamaumauga a leoleo, i le 28.

“A faatusatusa atu i le tausaga talu ai 2021, o le numera faamauina e le Matagaluega o le 19”.

Saunoa Papalii, ua faamauina se siitaga e lata i le 50%.

Tā’ua foi e le Sui Komesina, e toalua ni talavou sa taofia i le falemai i le vaiaso talu ai, i ni mataupu eseese e aafia foi i lenei lava mataupu. Saunoa Papalii o se tulaga fiafia tele ona ua toe manuia i laua ma ua toe tea i tua.

Ua tuuina mai se tuualalo a le matagaluega e tauala mai i le Sui Komesina.

“O le pule i le ola e lē o le tali lea o faafitauli, ae valaau mai i le Matagaluega o loo iai lava foi latou e iai tomai faapitoa e pei o le Faataua o le Ola, latou te faatalatalanoaina ma tuuina atu fesoasoani talafeagai.”

Na taumafai atu se avanoa i le Faataua le Ola, peitai, na tali mai le tamaitai ofisa ia Lineta Iakopo, e le mafai ona tuuina mai se faamatalaga i se isi lava tulaga e pei ona fesiligia, ae o loo i Niu Sila i le taimi nei le Pule Sili o le Faataua le Ola, Papalii Tiumalu Caroline Ah Chong, e mafai ona tali mai.

Afai o iai ni manatu faapea ia te oe, valaau mai le numera o le telefoni vili fua (free calling number) 800-5433. O loo iai nisi o loo fia fesoasoani atu ia te oe.

(10)