Ua faafoi e le faiaoga a le Au Siisii lana $10,000 tala e vaevae mo i latou na ausia pine siliva mo Samoa.
I se faatalatalanoaga ma le afioga Tuuaopepe Jerry Wallwork ina ua maea ona tauaaoina se meaalofa tupe $10,000 mai le Malo o Samoa, sa ia saunoa ai e faapea, “Ua faafetai i le Malo mo le foai ma le faa’aloalo maualuga”.
“Ou te le tuua i lalo le faa’aloalo, o lau pule lea. Ae o la’u siaki o le a vaevae tai lua afe mo tagata taaalo e toafa lea na mauaina le pine siliva..”
Saunoa Tuuaopepe, o ia ua masani i le olaga taalo sa ui mai ai foi peitai, o nai alo ma fanau sa iai lava le naunautaiga i le pine e gata ai pine. Sa finau foi i le malosi e gata ai ina ia tau lau o le faamoemoe, peitai ua le o gatusa foi le finau ma le taunuuga ua iai, ua le ausia ai le pine auro ae ua faamanuiaina i nisi pine.
“Ae talosia ia mo le lumanai e pei ona saunoa iai le Minisita, o le a silasila le Malo i taui tau tupe ina ia faasafua ma faasopolia faamanuiaga tau seleni i soo se pine ua ausia e se tagata ta’alo.”
E toafa ni sui o le au taaalo a Samoa na manumalo i pine siliva i taaloga sa faia i Birmingham.
E toatolu o le au siisii – Vaipava Ioane 67kg, Jack Opeloge 109kg ma Feagaiga Stowers 87+kg.
O le isi pine siliva mo Samoa sa mauaina lea e Ato Leau Plodzicki-Faoagali mo le boxing heavyweight.
O le sauniga i lenei aso na molimauina ai le auai o le tamaitai ia Feagaiga Stowers, Vaipava Ioane ma Jack Opeloge, lea sa latou ausia uma pine siliva i Taaloga o Malo o le Taupulega.
(1)
