Tuuina atu e le Kapeneta ni Aiaiga Faapitoa mo le Fa’aauau o Panoa

"Fa’ailoa e Lautimuia, ua fautuaina fo’i e le afioga i le Palemia Panoa, ina ia taofi le toe talanoa so’o i ala fa’asalalau ma tusitala, ma so’ona talatala ai matā’upu tupito a le Fa’alapotopotoga..

0
2816

30 Me 2024, Pesetā Tusiga Taofiga, Sooupu a le Malo. Sa le’i faigofie le tōfā sa’ili mo se finagalo autasi o le Kapeneta e tusa o le matā’upu, e pei ona fesiligia ai le fa’atinoga o tiute o le Ta’ita’ifono o le S.N.P.F. iā Panoa Moala Tavita, po’o sosolo i luga o Faiga Fa’avae ma Tulafono ua mae’a fa’ata’oto a le Fa’alapotopotoga.

Ui o lea, na fa’ailoa manino e le Minisitā o le Matāgaluega o Tupe iā Lautimuia Afoa Uelese Va’ai, i le mae’a o su’esu’ega fa’apitoa na nafa ma le Komiti sa iloiloina lea matā’upu, ma iloa ai e le’o a’afia lava se Tulafono i le fa’atinoga o tiute fa’aTa’ita’ifono a Panoa.

Saunoa le Minisitā o Tupe, ua toe fa’aa’e Panoa i lona tofiga, auā o ia o se tagata e matuā agava’a i le galuega, ma ua leva fo’i o tautua ai i le Fa’alapotopotoga i le tofiga o le Ofisa Sili o Pulega.

Peita’i, ua ‘ave iai ma aiaiga fa’apitoa a le Kapeneta, ina ia usita’ia ma taofia ai le ono toe tupu mai o lenei lava matā’upu i le lumana’i.

Fa’ailoa e Lautimuia, ua fautuaina fo’i e le afioga i le Palemia iā Fiame Naomi Mataafa ia Panoa, ina ia taofi le toe talanoa so’o i ala fa’asalalau ma tusitala, ma so’ona talatala ai matā’upu tupito a le Fa’alapotopotoga.

Saunoa Lautimuia, o su’esu’ega fa’alotoifale fo’i na faia e le Komiti Fa’atonu ma le Ofisa Sili o Pulega a le Fa’alapotopotoga aga’i i Sui o le Pulega na tusi atu iā te ia, ua toe fa’apafala. Ma e leai se a’afiaga o i latou nei i lea matā’upu pe o fuafua fo’i se fa’ai’uga e fai i ai.

Samoa is the Home of Taula. Enjoy responsibly.

E tāua i le Kapeneta le fa’aleo o finagalo ma atugāluga o so’o se tagata faigaluega a le Mālō e tusa o matā’upu fa’apea, ma ia ‘aua ne’i taotaomia ona o le va’ai i ē mau tofi ae lē faia ai le mea tonu ma le sa’o.

Saunoa manino le Minisitā, e lē taofia le fa’aāli o manatu o le aufaigaluega ae tatau fo’i ona fai fuafua, ma ia iloa lelei le laina e vase ai le va fa’afeagai ma le isi uso ā faigaluega.

Ua tu’uina atu le fa’atonuga a le Kapeneta iā Panoa, o le Komiti Fa’atonu, Pulega ma le Aufaigaluega a le S.N.P.F. ina ia toe āuli ia mafolafola lelei a latou fa’afitauli, ma ia iloa le va fa’afeagai ai o le tasi i le isi.

                  Your official broadcaster for Paris 2024

Na ta’utino e le Minisitā, ui i nei fa’afitauli ua tutupu mai le Fa’alapotopotoga, ae leai, leai, leai lava ma se a’afiaga o saofaga a le au fai saofaga a le Fa’alapotopotoga, ma o lo’o saogālēmū pea seleni a nai o tatou tagata i totonu o le Fa’alapotopotoga.

Fa’ailoa e Lautimuia, e āoga mea tutupu, e fotua’i ai malama fou auā le matimatiina o le galuega faifaipea a le Fa’alapotopotoga ina ia manuia Samoa aemaise o lana au fai saofaga i le lumana’i.


Tusiga Taofiga