Tuualalo le Ofisa Sili o le Matagaluega i Faiaoga e Tulai Mai

0
107

Ua faalauiloa se finagalo o le Ofisa Sili a le Matāgaluega o Aoga le afioga Aeau Chris Hazelman, e matuā faamalosia le a’e mai pea o faiaoga ma pule aoga e tapena mea’aoga a le fanau.

SOS Togafuafua poo Salelologa.

O le finagalo o Aeau, e tapena meaaoga a le fanau e omai matua e piki atu. Lea ua  tuualalo ai le Ofisa Sili i faiaoga e tulai mai.

“Faamolemole faiaoga, tulai mai, e lē o se vaiaso malolo lenei mo faiaoga ma pule aoga. Aua ne’i toe tulai mai le faafitauli lea na tulai mai i le koviti, e fitu vaiaso na malolo ai aoga, ae leai ma se galuega a faiaoga ma ulu aoga na faia.”

Na tā’ua e Aeau, o le a faatino galuega a susuga i Asiasi Aoga i totonu o itumalo taitasi, e unaia ai faiaoga e faatino o latou tiute, aemaise o le a faatino foi asiasiga a le Ofisa o Aoga e mataitu ai aoga taitasi poo faatino le pito laau a faiaoga.

O le toe malolo ai o aoga mo le tasi le vaiaso o lea ua ave ai se faamamafa a le Ofisa Aili i le pito laau a faiaoga e tulai mai.

O le vaitaimi o le koviti e pei ona aafia ai Samoa, e fitu vaiaso sa malolo ai aoga, lea foi na tuuina atu ai mea’aoga a le fanau i tua i aiga mo le faatinoina.

Na tā’ua e Aeau e le’i atoa ona lelei le tapenaina o vaega uma. O nisi o faiaoga sa malolo i lea piriota, ae o isi matua e le’i o’o ifo e piki mea’aoga a le fanau. Saunoa Aeau, o se taimi tonu lava lea e galulue felagolagomai ai faiaoga ma tuitui i le pito laau a matua.

E tasi le vaiaso lea ua toe faaopopo e malolo ai aoga i se faaiuga a le Kapeneta, ina ua maua lipoti le faatuputupaia o le aofai o tamaiti o loo oo atu i aso taitasi i le falemai i Motootua, mo togafitiga o le pepesi ai o le fulu.

Aiono Dr Alec Ekeroma.

E pei ona saunoa le Ofisa Sili o le Matagaluega o Soifua Maloloina, Aiono Dr Alec Ekeroma, e silia ma le 1,500 tamaiti na oo atu i le falemai i le vaiaso e tasi. O se numera siitia tele pe a faatusatusa i le masina o Mati, e na o le 500 tamaiti na oo atu mo togafitiga i falemai.

O loo tulimata’i pea e le Matagaluega o Aoga faapea le Matagaluega o Soifua Maloloina poo ua faaitiitia le aofai o le fanau o loo pesia, ma toe fetuunai ai se faaiuga mo le toe ae mai o le fanau.